Hơjan hlim ia ling dăo ngă răm hĭ 5 arăt jơlan phun dêh čar, jơlan đĭ čư̆ čun čue Prenn, 3 arăt jơlan tơring hăng lu jơlan pơkŏn amăng tơring čar Lâm Đồng, hăng rơnoh prăk pơsir him lăng hơmâo năng ai ñu truh 361 klai.

Ƀơi jơlan čun čue Mimosa, Khul wai lăng kơčăo bruă mrô 85 hlăk pok jơlan nao rai jăng jai, him lăng čuk pơkra giong amăng lơ 29/11/2025; hơdră man pơdong tơdrông tua prong 9 met, hơmâo pơsit laih, man pơdong mơ̆ng lơ 10/12, amăng 3-4 blan khom ngă giong. Ƀơi jơlan čun čue čư̆ Dran lĕ, hơmâo anih lŏn dlưh kriăng mơ̆ng kơčong čư̆, lŏn dor arăng kuăi pơƀut laih, pơ agaih brơi jơlan nao rai dưi pơhluh, kiăng ngă giong lơ 10/12 mơ̆n; jơlan čun čue Gia Bắc hlăk pơhluh brơi hơmâo jơlan rô nao rai ƀơi anih lŏn tơhlom. Ƀơi mông jơnum, ơi Nguyễn Hồng Hải, Kơ-iăng khua jơnum min mơnuih ƀôn sang tơring čar Lâm Đồng jăm ƀuah mơ̆n anom bruă wai lăng, pơgang ba jơlan phun thun blan rơgao, biă mă ñu ƀơi čư̆ Prenn, kah hăng amăng jang phun mut nao rai hăng Đà Lạt mơ̆ hơmâo tơlơi truh kơtang răm ƀăm. Ñu pơtrun hiăp kơ Gơnong bruă Man pơdong hăng Khul wai pơgang jơlan tơring čar, khom ming pơkra glăi tañ khut khăt hlâo kơ truh bơyan ngă yang čơkă thun phrâo djuai ania, pơhlom brơi jơlan nao rai hiam klă amăng rơnuč thun.