Hơdôm hrơi giăm tê̆t, ƀơi hơdôm anih rôk tui jơlan rơdêh đuăi hmar Khánh Hoà -Buôn Ma Thuột, ară jơlan găn nao să Ea Knếc, tơring glông Krông Pač ăt glăk ƀuh lu mơnuih dŏ man pơkra. Jơlan rơdêh đuăi hmar Khánh Hòa-Buôn Ma Thuột glông giăm 117,6 km tơkuh nao rai tơring čar Khánh Hòa -Dak Lak.

Ring bruă anai kah pơpha jing 3 rơnoh prăk tuh pơ alin, rơnoh tal 1 yua tơring čar Khánh Hòa pô tuh pơ alin; tal 2 lĕ yua Ding jum wai lăng jơlan glông; tal 3 yua tơring čar Dak Lak man pơdong. Rơnoh prăk anai hơmâo tơring čar Dak Lak jao anom bruă wai lăng hơdôm ring bruă tuh pơ alin man pơkra jơlan glông hăng ngă hmua amăng pơđĭ kyar ƀon lan tơring čar ngă pô tuh pơ alin man pơkra. Amăng bơyan čơkă thun phrâo Giáp Thìn 2024 anai, hơdôm anom bruă rơkâo kơ pơhlôm brơi djơ̆ hrơi mông, ngă klă amăng man pơkra, kiăng đing nao klă hơdră djru brơi mơnuih mă bruă lơm djru man pơkra ring bruă djơ̆ tơlơi pơkă.