Hơmâo pran lơ̆m buh eng ao tui gru djuai ania K’ho, adơi Sruk Đan, hrăm anih 9, Sang hră čem rông ană bă djuai ania ƀiă gưl 2 Dam Rông (Lâm Đồng) brơi thâo:

“Kâo thun anai hrăm anih 9 laih, anun sang hră kiăng nao pơ pơƀut nao pơ sang hră tañ hloh, mơ̆ng lơ 22/8 laih. Gơyut gơyâo amăng sang hră nao pơƀut lu biă. Thun anai, jing anih hrăm rơnuč gưl 2, anun jing kâo pơmin mă pô hrăm hră kiăng thâo. Mut thun hrăm phrâo, sang hră, gơnam yua amăng sang hră hơmâo djŏp djel yơh, hiam mơn, agaih mơn, sang hră hơmâo pơkra phrâo, kâo mơ-ak biă. Bơyan pơdơi prong phrâo rơgao, kâo glăi pơ sang, djru amĭ ama lu bruă mơn, kah hăng tơnă asơi, rao mŏng tơñan, ngui hrŏm, ră ruai tom pô amai glăk ruă, kiăng ƀu tañ suaih. Thun hrăm phrâo rơgao, kâo hrăm ƀu thâo đơi ôh, anun jing amăng thun hrăm anai kâo amra gir hloh, kiăng hrăm rơgơi hloh, kiăng huăi rơngiă pran amĭ ama čem rông, brơi hrăm hră”.

Tơring glông Dam Rông jing kual tơnap hloh mơ̆ng tơring čar Lâm Đồng, hăng mrô mơnuih djuai ƀiă hơmâo năng ai 70% mrô mơnuih. Hơdôm thun laih rơgao, Ping gah hăng Kơnuk kơna hơmâo lăng ba bruă pơtô hăng pơjuăt ƀơi plơi pla. Hrŏm hăng gơnam yua, anih hrăm hơmâo man pơdong kjăp, hiam mơn, čơđai djuai ƀiă ƀơi anai ăt hơmâo mă tơlơi djru mơ̆ng Ping gah, Kơnuk kơna. Biă ñu, ană plơi thâo pơmin brơi ană bă hrăm hră hloh mơn. Amăng hrơi mut thun hrăm phrâo, amai Me Nhi ba ană ñu nao pơ sang hră, pơtă kiăng ană ñu gir hrăm rơgơi.

“Lơ̆m hrăm anih 6, sang hră đom lăm čem rông ană bă djuai ania ƀiă tơring glông, hơmâo sang hră lăi pô hlơi hrăm rơgơi lĕ amra hơmâo prăk djru nao hrăm pơ dêh čar tač rơngiao. Tơlơi kiăng khăp mơ̆ng ană kâo lĕ hrăm rơgơi đah mơ̆ng dưi nao hrăm pơ dêh čar Japan. Yua hnun, khŏm gir hrăm hră, kiăng tơdơi kơ hrăm abih gưl 3, ñu hơmâo mă prăk djru hrăm pơ čar rơngiao. Sang anŏ gơmơi ăt djru ba abih pran jua laih kơ ană bă, rơngiao kơ prăp pơđom lui, sang anŏ gơmơi ăt hyu čan mă dơ̆ng mơn mơ̆ng djŏp prăk brơi ană nao pơ Japan, hrăm hră mă bruă rah”.

Tơlơi gơñăm nao mơ̆ng amai Me Nhi lĕ ƀu kơnong prăp rơmet brơi ană hrăm rơgơi amăng dêh čar đôč ôh mơ̆ khŏm nao hrăm pơ dêh čar rơgơi dong. Sang anŏ ñu hơmâo 3 čô ană, ană kơčua hrăm rơgơi, kiăng 2 čô hla tui.

“Tơdơi kơ ană kơčua anai, kâo hơmâo 2 čô ană dong, ăt glăk hrăm hră mơn. Dua čô tơdơi lĕ sang anŏ ăt pơtô lăi kiăng ƀing gơñu hla tui amai ñu. Mut amăng thun hrăm phrâo, sang anŏ gơmơi blơi hră, sum ao phrâo, blơi rơdêh tang wang, yua sang hră ataih rơbêh 1 rơwang km mơn. Ha bơnah dong yua ană hrăm gir, sang anŏ khŏm gir prăp rơmet brơi yơh. Ană bă kâo lêng kơ triang hrăm soh yơh, hrăm hai thâo mơn, anun jing kâo lăng kơdrưh yua biă, laih anun gir djru ba ană bă nao pơ sang hră”.

Amăng glai rưng mơtah ƀlip, Sang hră đom lăm čem rông ană bă djuai ƀiă gưl 2 Dam Rông (tơring čar Lâm Đồng) ngă pơhưč mơta lăng hăng ia iŏm phrâo, čơkă thun hrăm phrâo 2023-2024. Nai Nguyễn Hữu Hanh - Kơ-iăng khua sang hră čem rông ană bă djuai ƀiă tơring glông Dam Rông brơi thâo, mah pơ kual ataih yaih, samơ̆ gơnam yua amăng sang hră ăt hiam mơ̆n, pơhlôm bruă pơtô hăng hrăm. Thun hrăm anai, mă prăk mơ̆ng Jơlan hơdră dêh čar pơđĭ kyar bơwih ƀong huă - mơnuih mơnam kual mơnuih ƀôn sang djuai ƀiă hăng kual čư̆ siăng rơwang thun 2021-2030, sang hră hơmâo pơkra hiam hloh, mơ̆ng anih hrăm truh kơ anih đih pit ƀong huă.

“Ră anai, anih anom gơnam yua mơ̆ng sang hră hơmâo pơkra hiam laih. hơdôm boh anih hrăm hơmâo pok ia kulơr, man atur ƀrik, pơnăng sang hơdjă mơn; bơwih brơi kơ bruă pơtô hrăm. Anih čơđai đih pit, ƀong huă ăt hơmâo pơkra mơn, hơmâo man ƀrik ƀơi pơnăng, pơhlôm prăp rơmet klă hloh kơ ƀing čơđai dŏ glăi đih pit”.