Gơnong bruă pơtô pơjuăt pơsit tong anăn pơphun thun hrăm phrâo 2024-2025 lĕ “Gơgrong, ƀu pơdơi pơplih phrâo, hrưn đĭ klă dong” hăng lu bruă jao akŏ phun. Kiăng pok pơhai ngă tui bruă jao thun hrăm 2024-2025 lăp djơ̆, sit nik, tŭ yua, Ding jum pơtô pơjuăt rơkâo Jơnum min mơnuih ƀôn sang hơdôm boh tơring čar, ƀôn prong kơtưn amăng git gai, pel ĕp, pơtrut pơsur pơhlôm djop gơnam măi mok amăng pơtô hrăm hlâo kơ thun hrăm phrâo.

Laih dong, hơmâo hơdră hmao tlôn pơsir hĭ bruă kah pơpha nai pơtô  dŏ bưp lu tơnap tap ră anai tui tơlơi glăm ba. Pơjing, pok pơhai ngă tui akŏ bruă djru brơi ƀing čơđai sang hră sang anŏ ƀun rin, giăm ƀun rin, ƀing čơđai tui hơdră djru, čơđai sang anŏ tơnap tap, kual ataih, asuek, kual čư̆ siăng kriang pơtâo, ƀing čơđai djuai ania ƀiă, hơmâo djop hơdrôm hră, gơnam yua amăng hrăm hră hăng hơdôm tơlơi kiăng pơkŏn dong; anăm brơi ƀing čơđai yua sang anŏ tơnap tap mơ̆ lui sang hră.