Amăng mông jơnum lok 29 laih rơgao, Jơnum min apăn bruă Khua pơ ala mơnuih ƀôn sang hơmâo pơgôp hiăp kơ bruă lăi pơthâo, tŭ mă, pơplih pơkra črăn tơlơi phăn hơdôm anom bruă brơi čan prăk (čih pơkra). Tơdơi kơ mông jơnum, Jơnum min bơwih ƀong huă hơmâo mă bruă hăng sa, dua anom bruă bơdjơ̆ nao kiăng pel ĕp, hmư̆ tơlơi pơgôp hiăp rơnuč mơng Jơnum min apăn bruă Khua pơ ala mơnuih ƀôn sang kiăng pơgiong črăn tơlơi phiăn anai.

Tơlơi phiăn hơdôm anom brơi čan prăk (čih pơkra) tơdơi kơ tŭ mă tơlơi lăi pơthâo hơmâo 15 črăn hăng 210 tơhnal, đĭ 10 tơhnal pơhmu hăng črăn tơlơi phiăn lăi pơthâo amăng jơnum lok 6. Amăng mông jơnum anai, Jơnum apăn bruă Khua pơ ala mơnuih ƀôn sang pơgôp hiăp kơ hơdră djru anom brơi čan prăk dưi tek rơwek nao tañ hloh; kơ tơlơi pơkă plih tŏ tui amăng sa, dua boh tơhnal mơng tơlơi pơtrun; kơ lăng glăi tơlơi bơdjơ̆ nao.