Kơčăo bruă hơmâo man pơkra mơ̆ng akŏ thun 2021, pok pơhai ngă ha amăng plĕ mơ̆ng akŏ thun 2022, prong 1.810 ha. Truh ră anai, lu ring bruă phun mơ̆ng kơčăo bruă hơmâo pơkra giong laih, ngă giong laih bruă por hyu sem lăng anŏ lăp djơ̆, pơtŏng lăng bruă por hiư̆m pă. Tui hăng tơlơi sem lăng mơ̆ng Grup mă bruă pơdŭ pơgiăng rơdêh por (Air Transport Action Group), lơ̆m mă yua, tơdron rơdêh por djru ba 22.000 čô hơmâo bruă mă, gum pơgôp năng ai 3,7 klai USD/thun...

Hăng pran jua gir run kơtang, bruă man pơkra tơdron rơdêh por Long Thành - črăn sa gir ngă giong hlâo lơ 19/12/2025, pơhlôm anŏ kjăp, klă, por djơ̆ boh thâo, ba mă yua amăng ha mơkrah akŏ thun 2026....Pơtum glăi ƀơi mông ngă bruă, Khua git  gai Ping gah ơi Tô Lâm bơni kơ ding jum, anom bruă, tơring čar bơdjơ̆ nao gir găn rơgao črăn blung a pơhlôm brơi djơ̆ hrơi pơkă. Lăi pơtŏng anŏ yom mơ̆ng Kơčăo bruă, Khua git gai Ping gah kiăng, pơhlom man pơkra tơdron rơdêh por jar kmar Long Thành ngă bruă hăng pran jua hrưn đĭ pơplih phara, nao hlâo, ba jơlan, jing gru phrâo kơ tơdron rơdêh por rơnuk phrâo, yom, kjăp hăng rơgơi, jing anih ngă pơhưč hmư̆ hing hloh ƀơi kual Ngŏ Dơnung ASIA. Ƀơi mông ngă bruă, Khua git gai Ping gah ăt pơgôp hiăp kơ hơdôm tơlơi rơkâo đĭ mơ̆ng hơdôm boh tơring, pô tuh pơ alin, hăng jao kơ Anom bruă Ping gah tum pơƀut glăi, mơit kơ hơdôm anom bruă bơdjơ̆ nao sem lăng ječ ameč pơsir brơi, pơhlôm djơ̆ tơlơi phiăn, laih anun kiăo tui pran jua gum djru abih pran mơtăm kiăng Kơčăo bruă dưi pơkra giong djơ̆ hrơi pơkă, pơđĭ kyar kjăp phik amăng rơwang pơ anăp.