Abih tih rơnoh prăk anun dưi hơmâo grup khua mua mơ̆ng Puih kơđông tơhan pơgang guai dêh čar hăng djop anom bruă ba nao jao tơl tơngan ƀing čơđai sang hră. Amăng anun, hơmâo 1,8 klai prăk pioh brơi kơ 253 čô čơđai sang hră hơmâo anăn amăng kơčăo bruă djru mơ̆ng Khua mua, ling tơhan čung ba nao hrăm hră. Ƀing čơđai sang hră anun lêng kơ sang anŏ ƀun rin tơnap tap dŏ ƀơi 13 boh să amăng kual giăm guai dêh čar lơ̆m 4 boh tơring glông, tơring čar Kon Tum, kah hăng : Đăk Glei, Ngọc Hồi, Sa Thầy hăng Ia H'Drai.

Ƀrô djơ̆ thun hrăm phrâo 2023-2024, djop puih kơđông tơhan ƀơi guai dêh čar ăt ƀơk gơnam yua hrăm hră kơ 15 čô čơđai jing Ană rông mơ̆ng puih kơđông tơhan pơgang guai dêh čar kiăng pơtrut pơsur h'ĭn pran jua mut thun hrăm phrâo 2023-2024.