Hơmâo bruă mă wai lăng črăn jơlan guai dêh čar glông ataih 292km sô̆ hăng dua boh dêh čar Lao hăng Kur, tơhan pơgang guai dêh čar tơring čar Kon Tum pơphun pok pơhai pơpha bruă mă khom thâo tong ten tơlơi pơhing ƀơi guai dêh čar, amăng anih hyu tir wai lăng; khom lăng sŭ tong ten ƀing ngă soh hăng pơgăn khut khăt tŭ yua lu mơta tơlơi soh sat, bruă ngă găn rơgao nao rai ƀơi guai dêh čar, ngă soh hăng tơlơi phiăn dêh čar.

Thun blan pơ anăp kiăng ngă giong bruă jao, pơgang hơđong tơlơi dưi ngă pô guai lŏn ia, pơgang rơnuk rơnua tong ten hăng hơđong kơđi čar amăng djop tơlơi či hơmâo, Thiếu tướng, ơi Nguyễn Hoài Phương Kơ-iăng khua git gai tơhan pơgang guai dêh čar Việt Nam lăi pơtong, abih bang khua mua, ling tơhan pơgang guai dêh čar tơring čar Kon Tum kơtưn bruă kơnuk kơna jao wai lăng jơlan guai dêh čar brơi kjăp. Hur har ngă bruă pơtom hiăp gum hrŏm hăng tơhan pơgang guai dêh čar mơ̆ng gơyut dêh čar Kur, Lao kiăng akŏ pơdong bruă mă pơgang rơnuk rơnua, mơak klă, giăng mah pŭ ƀăn ƀơi guai dêh čar pơđĭ kyar hăng kjăp hơđong.