Anai lĕ sa amăng rơma glông kơsung blah mut nao pơklaih rơngai Sài Gòn, ling rơhan mrô 3 hăng bruă jao sua glăi tơdron rơdêh por Tân Sơn Nhất hăng Anom pơphô bruă-Anom bruă git gai phun mơng ayăt. Kiăng sua glăi hơdôm anih anom mă bruă phun amăng lơ 30/4 hing ang, ling tơhan hơmâo hơdră kơsung blah pơplih pơčeh phrâo, hơdeč hmar hăng khut khăt. Trung tướng Nguyễn Quốc Thước, lơm anun ngă Khua pơphô bruă khul ling tơhan mrô 3, mơnuih ba jơlan hlâo sa grup tơhan kơsung blah mut nao Sài Gòn hơmâo tơlơi bơră ruai glăi hơdôm hrơi hing ang blah wang kiăng pơkiăo đuăi ayăt:

“Tơdron rơdêh por Tân Sơn Nhất hăng anom pơphô bruă dưi sua glăi abih krep 11 mông 30 mơnit. Yua anun dong mơng 11 mông truh 11 mông 30 mơnit 5 anih  pơkă hlâo ƀơi Sai Gòn lêng kơ dưi sua glăi soh. Tơdơi kơ blah dưi ƀơi Dinh Độc Lập amăng pran jua kâo ăt pơ-ư ang biă mă, samơ̆ ăt hơmâo tơlơi hning rơngŏt mơn, lơm ƀu hơmâo wŏt Wa Hô. Lơm anun ƀing gơmơi gir run blah pơkiăo đuăi ayăt Mi, mơ̆ Wa Hô glăk ruă kơtang, Wa brơi thâo: ƀing adơi ayong gir pơklaih rơngai tañ hloh Sài Gòn kiăng wa dưi nao čuă jơmư neh met wa pơ kual Dơnung…Mơguah hrơi tơdơi mơng Gong phun jua pơhiăp dêh čar Việt Nam pôr tơlơi adôh mơng Phạm Tuyên hăng anăn “Như có Bác Hồ trong ngày vui đại thắng”, lơm anun ƀing gơmơi mơ-ak amăng pran jua biă mă, wa Hô rai pơ anai yơh, mơnuih ƀôn sang kual kơdư hluai tui pô pơčeh amăng tơlơi adôh dưi ba wa rai pơ anai, yua anun amăng pran jua ăt hok mơ-ak mơn”.

Giăm hmâo 50 thun găn rơgao yap mơ̆ng hrơi tlaih rơngai kual Dơnung dêh čar pơlir hơbit lŏn ia, samơ̆ tơlơi pơđom pioh hrơi khul ling tơhan tlaih rơngai kơsung mut tlaih rơngai Sài Gòn ăt dô̆ hơnong mơn amăng pran jua mơnuih lăng ƀuh tơlơi anun. Ư-ang amăng ƀut mơnuih čih tơlơi pơhing phrâo Việt Nam blung a ƀuh ƀô̆ ƀơi Dinh Độc lập djơ̆ amăng yang hrơi dŏng lơ 30/04/1975, pô čih tơlơi pơhing phrâo Trần Mai Hưởng, Khua phun akha Ƀirô čih tơlơi pơhing phrâo dêh čar Việt Nam hmâo čih glăi gru rup lăi laih tlaih rơngai hăng anăn ñu: “Rơdêh sar khul ling tơhan tlaih rơngai kơsung mut dinh Độc Lập yang hrơi dŏng lơ 30/4/1975” hăng lu tơlơi čih lăi pơhing kơ hrơi tlaih rơngai gru grua. Pô čih tơlơi pơhing phrâo Trần Mai Hưởng brơi thâo lơm rơdêh com măng ca pơgiăng ƀing čih tơlơi pơhing phrâo kơsung mut nao giăm ƀôn prong hơdôm asar bôh phao pơanah bơbru mơ̆ng ƀing ayăt ăt dô̆ mơn, rơdêh pơgiăng mơnuih mă tơlơi pơhing phrâo khom kiăo tui rơdêh sar pioh bĕ asar bôh phao. Samơ̆ mut truh amăng ƀôn prong lĕ sa anih anom phara, mơnuih ƀôn sang ur dreo tơket tơkeng tơbiă ƀơi jơlan čơkă khul tơhan tlaih rơngai:

“Mơnuih ƀôn sang mơ-ak biă, brơi gơnam hăng ba ia mơñum kơ adơi ayong. Sa čô nô anet năng ai ñu 13-14 thun đĭ hăng dlông rơdêh ƀing čih tơlơi pơhing phrâo ñu dơnong kơ dŏng giăm pơnăng rơdêh hăng ur đĭ prong lĕ: Tlaih rơngai laih, tlaih rơngai laih. Bơ̆ mơnuih ƀôn sang dua bơnah jơlan tơbiă ƀơi jơlan kuar mă ling tơhan, mă tơngan mơ-ak phăk klao hăng adôh. Adôh hơdôm tơlơi adôh kah hăng tơlơi adôh “Tiến về Hà Nội” mơ̆ng Văn Cao lĕ hmâo glông pia: “Trùng trùng quân đi như sóng, lớp lớp đoàn quân tiến về.”glông anun djơ̆ hăng lơm anun biă. Djop mơnuih adôh tơlơi adôh anun hăng mơ-ak biă, gơñu črâo jơlan djru brơi ƀing gơmơi anăp nao”.