Jing sa amăng 84 čô khua mua pơ ala mơnuih ƀôn sang tơring čar Dak Lak dưi ruah ngă bruă rơwang thun 2026-2031, yă H’Giang Niê, Khua git gai Ping gah, Khua jơnum min pơ ala mơnuih ƀôn sang să Ea M’Droh, tŏ tui hơmâo tơlơi dong yua mơng mơnuih ƀôn sang tơdơi kơ sa rơwang ngă bruă amăng Jơnum min pơ ala mơnuih ƀôn sang tơring čar. Tui yă H’Giang, bruă tŏ tui ruah ngă khua dong ƀu djơ̆ kơnong tơlơi tŭ yap mơng mơnuih ƀôn sang đôč ôh mơ̆ ăt kiăng hơmâo tơlơi rơkâo prong ƀiă dong amăng bruă mă. Rĭm pok hră mơng neh met wa mơ-it nao tơlơi đăo gơnang pơplih phrâo, pơđĭ kyar kơtang ƀiă dong amăng kual lŏn anai. Yă H’Giang brơi thâo:

“Amăng hơbô̆ bruă gong gai ƀon lan dua gưl kâo pơsit tơlơi glăm ba mơng pô lĕ “anih pơtruh nao rai” ƀơi anăp hăng giăm mơnuih ƀôn sang hloh. Kâo amra tŏ tui jê̆ giăm, lăi pơthâo tơlơi sit nik hăng hmao tlôn hơdôm tơlơi rơkâo đĭ mơng mơnuih ƀôn sang amăng hơdôm mông jơnum khua mua pơ ala mơnuih ƀôn sang tơring čar, pơhlôm hơdôm tơlơi pơtrun lơm ngă tui brơi kơ lăp djơ̆ tơlơi rơkâo sit nik mơng ƀon lan. Amăng anun, kâo đing nao biă mă kơ bruă ngă tui hơdôm hơdră djru djuai ania, pơtrut kơtang bơwih brơi tuai čuă ngui pơ đang hmua pơlir hăng djă pioh gru grua, djru brơi neh met wa hơđong tơlơi bơwih ƀong huă hăng hrưn đĭ pơklaih mơng ƀun rin hơđong kjăp”.

Bơ hăng yă Ngô Thị Minh Trinh, Khua git gai Ping gah, Khua jơnum min pơ ala mơnuih ƀôn sang să Ea Knuếc, tơring čar Dak Lak brơi thâo, amăng rơwang pơđĭ kyar phrâo, ƀing khua mua ruah đĭ ƀu djơ̆ kơnong đing tơngia hmư̆, lăi pơthâo tơlơi čang rơmang mơng mơnuih ƀôn sang, wai pơgang brơi tơlơi dưi djơ̆ tơlơi phiăn mơng mơnuih ƀôn sang đôč ôh mơ̆ ăt kiăng khin hơtai, thâo rơgơi hăng tuh rơyuh pran jua, mut hrŏm lu ƀiă dong amăng bruă pơjing hăng krăo lăng hơdră bruă, sit biă ñu hơdôm bruă mơ̆ ƀon lan hơmâo tơlơi gal samơ̆ aka ƀu mă yua lăp djơ̆. Yă Ngô Thị Minh Trinh brơi thâo:

“Anai lĕ tơlơi pơ-ư ang hăng kâo pô hăng kâo lêng kơ pơmĭn lĕ tơlơi pơ-ư ang hăng tơlơi glăm ba kiăng nao hrŏm. Yua anun yơh kiăng ngă klă hloh tơlơi glăm ba lĕ khua pơ ala mơnuih ƀôn sang. Hăng tơring čar Dak Lak, tơlơi gal prong lĕ pơđĭ kyar ngă hmua, hăng tơlơi glăm ba lĕ sa čô mơnuih pơ ala brơi mơnuih ƀôn sang, kâo amra đing nao kiăng hrŏm hăng gong gai djop gưl pơjing glông pơlir rơnoh sĭ mơdrô brơi hơdôm gơnam đang hmua sĭ hơmâo nua kiăng pơhlôm hơđong brơi mơnuih ƀôn sang kah hăng pơđĭ kyar hrŏm amăng tơring čar hăng sit biă ñu lĕ đing nao pơđĭ kyar dua mrô”.

Tui sit nik brơi ƀuh, Dak Lak hơmâo tơlơi dưi prong amăng ngă hmua hăng, hăng tơdu amăng bruă tuh tia pơkra ming-bơwih bơwang, boh thâo ia rơgơi. Rơwang thun 2026-2031, Khua mua pơ ala mơnuih ƀôn sang hăng anom bruă pơ ala mơnuih ƀôn sang ƀơi tơring čar amra ngă djơ̆ hơdôm tơlơi rơkâo mơng mơnuih ƀôn sang amăng djop bruă, sit biă ñu lĕ pơtô pơjuăt, pơplih pơčeh phrâo-pơphun bơwih ƀong huă, lŏn mơnai, pơkra pơjing gơnam tam, pơjing anăn păn hăng pơlir anih anom sĭ mơdrô.

Tơdơi kơ hrơi plĕ hră, tơlơi đing nao hloh mơng mơnuih ƀôn sang ruah khhua lĕ ƀing khua mua mơ̆ ƀing gơñu ruah amra ngă tui hiưm pă hơdôm bruă hơmâo lăi nao amăng jơlan hơdră bruă mă. Tui ơi Trần Xuân Định, Khua anom bruă djop djuai ania mơnuih mơnam, ƀut plơi mrô 2, phường Thành Công, tơring čar Dak Lak, mơnuih ƀôn sang amra kiăo tui lăng hăng rơkâo hơdôm ƀuăn hlâo kơ hrơi plĕ hră hơmâo pơdah tong ten bruă mă rĭm thun amăng rơwang ngă bruă.

“Ƀing khua mua ruah đĭ lĕ mơnuih pơ ala brơi mơnuih ƀôn sang, jing anih pơtruh nao rai kơplah wah tơlơi pơtrun mơng Ping gah hăng djơ̆ pran mơnuih ƀôn sang. Tơlơi kâo čang rơmang hloh lĕ ƀing khua mua lêng kơ jê̆ giăm, pơlir hăng mơnuih ƀôn sang, thâo tơlơi hơdip mơnuih ƀôn sang kiăng pơjing tơring čar pơđĭ kyar ƀiă dong pơ anăp anai.”

Tui yă Cao Thị Hòa An, Ding jum khul apăn bruă Ping gah, kơ-iăng Khua git gai Ping gah tơring čar, Khua jơnum min pơ ala mơnuih ƀôn sang tơring čar, Khua Jơnum min plĕ hră tơring čar Dak Lak, tal plĕ hră ruah Khua pơ ala mơnuih ƀôn sang dêh čar tal XVI hăng Khua mua pơ ala mơnuih ƀôn sang djop gưl rơwang thun 2026-2031 amăng tơring čar hơmâo prap lui hăng pơphun klă hloh, pơhlôm ngă pô, djơ̆ tơlơi phiăn, rơnuk rơnua hăng truh kih hiam klă.

84 čô khua mua pơ ala mơnuih ƀôn sang tơring čar tal XI hơmâo mơnuih ƀôn sang ruah lĕ ƀing mơnuih ba gru kơ pran hơdip hăng tơlơi thâo thăi, pơ ala brơi tơlơi kiăng, tơlơi čang rơmang mơng djop djuai ania amăng tơring čar. Anai lĕ tơlơi pơ-ư ang rah, hăng tơlơi glăm ba prong, rơkâo rĭm čô khua mua kiăng gir run na nao, tŏ tui tơlơi gơgrong amăng rơwang ngă bruă phrâo:

“Ƀing khua mua, ƀing mơnuih hơdip ba gru hăng thâo rơgơi, kiăng tŏ tui tơlơi glăm ba, hơdip jê̆ giăm mơnuih ƀôn sang hăng lăi pơthâo tơlơi čang rơmang sit nik mơng mơnuih ƀôn sang. Laih dong, ƀing khua mua kiăng mut hrŏm pơsit hơdôm bruă yôm phăn amăng ƀon lan hăng krăo lăng kjăp bruă ngă tui tơlơi črâo trun, hơdră bruă, tơlơi phiăn amăng ƀon lan, kiăng hrưn đĭ klă bruă mă mơng hơdôm anom bruă mơnuih ƀôn sang ruah đĭ pơ anăp anai.”

Ƀing ta amra ƀuh, tơlơi truh kih mơng tal plĕ hră ƀu djơ̆ dŏ glăi amăng bruă pơgiong hơdôm bruă tui tơlơi pơkă đôč ôh mơ̆ ăt pok rai jơlan phrâo hăng lu tơlơi čang rơmang. Ƀing khua mua dưi ruah hrơi anai amra djă ba tơlơi đăo gơnang mơng mơnuih ƀôn sang, pơphun bruă ngă tui tơlơi glăm ba mơng ƀing gơñu hăng ngă bruă abih pran, ngă bruă rơđah rơđông, pơgôp ba Dak Lak pơđĭ kyar tañ hăng hơđong kjăp./.