Ơi Đặng Gia Duẩn, Khua git gai Ping gah phường Ea Kao brơi thâo, hrŏm hăng bruă pơsit hơdôm kual bơwih brơi tuai čuă ngui phun, tơlơi pơtrun kiăng ĕp lăng pơhrua sa, dua boh ƀon lan jing anih čuă ngui phun amăng tơring čar. Hrŏm hăng anun, ƀing khua mua rơkâo dưm dăp hơdôm akŏ bruă pơhlôm brơi klă hloh, pơlir hăng ană mơnuih hăng ƀô̆ mơta plơi pla, amăng anun hơmâo bruă pơkra glông hrĕ apui lơtrik gah yŭ ƀơi 14 boh ƀon lan, kah hăng pơtrut dưm dăp ba tơdron rơdêh por Buôn Ma Thuột jing tơdron rơdêh por jar kmar.

“Kơ bruă man pơdong anih anom, ƀing gơmơi hơmâo 2 mơta tơlơi, sa lĕ ƀô̆ mơta plơi prong anun kiăng pơkra glông hrĕ apui lơtrik gah yŭ amăng hơdôm boh ƀon lan. Dua dong lĕ tơdron rơdêh por, hăng tơlơi gal mơng tơring čar phrâo ră anai, ƀing gơmơi hơmâo 2 tơdron rơdêh por, kâo rơkâo kiăng dưm dăp kiăng ba tơdron rơdêh por Buôn Ma Thuột jing tơdron rơdêh por jar kmar, anun ƀing ta kah dưi pơđĭ kyar tañ hloh.”

Mơng bruă pơlir hơbit kual, ơi Lữ Ngọc Tân, Khua khul wai lăng kual bơwih ƀong huă Phú Yên, lăi pơtong tơlơi rơkâo tuh pơ alin man pơkra glông hrĕ apui lơtrik kiăng tŭ mă klă apui yua pơkra phrâo mơng kual Yŭ, djru pơdĭ kyar tuh tia pơkra ming ter hang ia rơsĭ. Ơi Tân ăt rơkâo kơsem min đing pơđoh ia jâo mơng tơdrun kompăn Bãi Gốc đĭ pơ kual Dap kơdư rôk tui jơlan rơdêh đuăi hmar Ngŏ-Yŭ, kiăng plai ƀiă ƀiă prăk duh logistics apui yua hăng pơtrut pơlir kual.

“Apui lơtrik pơkra glăi ƀơi kual Yŭ lu biă mă, gah Ngŏ hăng hơdôm kual ter hang ia rơsĭ kiăng apui yua lu yua bruă man pơkra glông hrĕ dăng hyu apui lơtrik djru pơđĭ kyar tuh tia pơkra ming yôm phăn biă mă. Rơngiao lơ apui lơtrik, đing pơđoh hyu ia jâo, hyuh gas dong. Tơdah ƀing ta pơlir hơƀit kiăng tuh pơ alin dưm đing pơđoh ia jâo, hyuh gas mơng mơng kual Ngŏ đĭ nao pơ Yŭ rôk tui jơlan rơdêh đuăi hmar anai, amra ngă prăk duh tuh pơ alin aset hloh. Ƀing ta dưm đing glông aka truh 150 km. Prăk tuh pơ alin mah ƀu lu samơ̆ ba glăi tŭ yua lu.”

Lăng nao tong ten ƀơi ƀon lan, ơi Huỳnh Ngọc Oánh, kơ-iăng Khua khul apăn bruă Ping gah phường Tuy Hòa, lăi pơtong hơnong pơkă đĭ dua wŏt prăk pơhrui rĭm akŏ mơnuih amăng tơring čar rơwang phrâo. Kiăng dưi ngă, tui ñu, kiăng tuh pơ alin kơtang hloh amăng man pơkra anih anom, sit biă ñu jơlan glông, laih dong tŏ tui pran kơtang amăng gru grua-tuai čuă ngui: kual ia rơsĭ Ngŏ pơlir hăng kual glai rưng gah Yŭ, ba glăi tơlơi pơtrut ha amăng plĕ amăng bơwih ƀong huă hăng mơnuih mơnam.

“Kiăng ngă tui tơlơi dưi prong amăng tơring čar rơkâo bruă tuh pơ alin pơlir hơbit man pơdong anih anom kơplah wah kual ia rơsĭ hăng čư̆ siăng; ƀu djơ̆ kơnong pơđĭ kyar bruă tuh tia pơkra ming đôč ôh mơ̆ ăt wŏt gru grua tui tơlơi pơtrun, ƀing gơmơi pơmĭn anai lĕ tơlơi dưi prong kual Ngŏ lĕ ia rơsĭ, pơlir hăng gru grua hơmâo djă pioh hăng tơkuh nao rai hăng kual Yŭ lĕ glai rưng, mơ̆ tơlơi ngă tơnap tap ră anai lĕ tuh pơ alin man pơdong anih anom, sit biă ñu lĕ jơlan glông.”

Hơdôm tơlơi pơgôp hiăp anai tŏ tui brơi ƀuh pran gơgrong, tơlơi čang rơmang hăng gir run pơplih phrâo, anăp nao pơđĭ kyar Dak Lak jing anih pơđĭ kyar dik dak amăng kual Dap kơdư hăng ter hang ia rơsĭ Dơnung tong krah amăng rơwang phrâo. /.