Tơring glông Ia Pa, tơring čar Gia Lai akŏ pơjing thun 2002, hăng 9 boh să. Amăng anun hơmâo 7 boh să tơnap tap hloh. Samơ̆, hăng pran gum pơgôp, mut hrŏm mơng djop anih anom kơđi čar, pran gum tơngan hrŏm mơng abih bang mơnuih ƀon sang, Truh ră anai, ƀô̆ mơta tơring glông Ia Pa hơmâo pơplih laih, hơmâo 2 boh să Ia Ma Rơn hăng Ia Tul đĭ plơi pla phrâo. Prăk pơhrui rĭm akŏ mơnuih ha thun rơbêh 40 klăk prăk. Ayong R’ô Hôk-dŏ amăng plơi Marin 3, să Ia Mrơn, tơring glông Ia Pa brơi thâo:

“Plơi Marin 3, să Ia Mrơn, tơring glông Ia Pa hơmâo lu mơnuih djuai ania Jrai dŏ hơdip hrŏm. Hlâo adih, tơlơi hơdip glêh tơnap biă mă yua ngă hmua tui hơđăp, jơlan nao rai tơnap tap mơn. Hrŏm hăng tơlơi gir run găn rơgao tơnap tap amăng bơwih ƀong huă hăng tơlơi đing nao mơng Ping gah, Kơnuk kơna tuh pơ alin, djru brơi plơi Marin 3 hơmâo pơplih laih, jơlan hiam hruaih, hơmâo sang jơnum plơi, tơdrŏn đă boh lông, hơmâo sang hră phrâo. Neh met wa thâo mă yua boh thâo phrâo amăng ngă hmua, rông hlô mơnong, thâo ngă hmua pơdai ia. Yua anun, truh ră anai, plơi Marin 3 hơmâo lu sang anŏ pơklaih mơng ƀun rin, tơlơi hơdip jai jơnap tui pơhmu hăng hlâo adih, hơmâo lu sang prong rơhaih man pơdong ngă pơplih ƀô̆ mơta plơi pla”.

Amăng hơdôm thun rơgao, ƀơi hơdôm bôh tơring glông: Tu Mơ Rông, Đăk Tô, Đăk Hà, Kon Plông, Kon Braih, tơring čar Kon Tum hmâo lu hlăk ai ba gru hlâo, tơdăm dra djuai ania Hơdang bơwih ƀong huă rơgơi hăng pơdŏng tơlơi hơdip mơda trơi pơđai, yâo mơ-ak. Rơđah biă ñu hơdôm hơdră Grŭp mă bruă hrŏm, Anom mă bruă hrŏm pla, pơkra phun jrao; Grŭp pơdah atông čing hơgor – suang… mơ̆ng khul hlăk ai, tơdăm dra ƀơi hơdôm bôh tơring glông Tŭ Mrông hăng Kon Plông. Hrŏm hăng bruă ngă đang hmua, lu hlăk ai, tơdăm dra dô̆ ba jơlan hlâo amăng gum hrŏm nao mă bruă pơ̆ dêh čar tač rơngiao, tŭ mă bôh thâo phrâo hơdră phrâo amăng bruă ngă đang hmua… Amai Y Za Nhi, 28 thun, ƀơi plơi Mô Bành 1, să Đăk Na, tơring glông Tŭ Mrông lăi tui anai:

“Khom pơsit rơđah ngă hiưm hơpă pioh ƀing ta hmâo sa tơlơi hơdip hơđong, bơwih ƀong đĭ kyar, biă ñu rơnuk hlăk ai ră anai jai kiăng triăng hrăm hră, mă bruă pioh pơđĭ kyar bơwih ƀong sang anô̆. Rơnuk hlăk ai ƀing ta tâ̆o hloh anăm dô̆ tơguan ôh mơ̆ khom yak rơgao tơnap, tơlơi lông, anăm alah ôh, kơnong kơ thâo čơkă mă thơ amra ƀu hmâo tơlơi hơdip hơđong ôh. Kâo hmâo sa tơlơi pơtă hăng ƀing gơyut hlăk ai khom thâo pơmin, pơhrăm drơi pô, gir run ngă hơdôm bruă hmâo yua kơ sang anô̆, kơ drơi pô, thâo gir run thơ čang rơmang ƀing ta amra hmâo tơlơi hơdip mơda pơđĭ kyar kah hăng djop mơnuih pơkon”./.