Sui mơng anai giăm 50 thun laih, hơdôm rơbâo čô hlăk ai tơbiă mơng plơi prong jưh jom kiăng kơ nao pơ kual Dơnung Dap kơdư čong jơnah jah glai bơwih ƀong huă tui tơlơi jak iâu nao pơjing kual bơwih ƀong phrâo. Anŏ ƀing gơñu djă ba ƀu djơ̆ kơnong pran hur har mơng hlăk ai đôč ôh ăt lĕ gru hơdip, pran jua mơng plơi pla kiăng nao pơjing, pơđĭ kyar amăng sa boh tơring glông. Ƀing gơñu djă ba anăn plơi pla hơđăp anun lĕ Mê Linh, Gia Lâm, Từ Liêm, Đông Anh…. kiăng pơ anăp brơi hơdôm boh plơi pla, să amăng kual lŏn phrâo. Să Liên Hà, tơring glông Lâm Hà ră anai lĕ anăn sa boh să amăng tơring glông Đan Phượng, ƀôn prong Hà Nội. Yă Nguyễn Thị Bích Hạnh tui sang anŏ nao pơ Lâm Đồng mơng anet, ră anai ñu lĕ Khua khul đah kơmơi să Liên Hà, ñu brơi thâo, đơ đam să hơmâo rơbêh 2.000 boh sang anŏ hăng giăm 9.000 čô mơnuih. Neh met wa ƀơi anai lêng kơ pơdah pran jua gum pơgôp amăng bơwih ƀong ngă đang hmua.

“Ƀơi Liên Hà, pran gum pơgôp mơng adơi amai amăng bruă man pơdong plơi pla phrâo hơmâo hrưn đĭ. Adơi amai hơmâo akŏ pơjing hơdôm grup ngă hrŏm pla phun kơbuă rông hlăt mrai ƀơi kua mơnuih djuai ania ƀiă. Adơi amai djuai ania Cil, K’ho hơmâo gir run pla phun kơbuă, djru čan prăk mơng anom bruă ngă hmua kiăng plơi hơ-i kơčua, tuh pơ alin pla phun hơbuă hăng blơi pơjeh phrâo. Mơng anun, tơlơi hơdip kơ adơi amai hrưn đĭ tong ten, yua anun hơmâo prăk phrui lu ƀiă rĭm hrơi kiăng pơhlôm brơi tơlơi hơdip mơda”.

Truh ră anai, prăk pơhrui rĭm akŏ mơnuih ƀơi tơring glông Lâm Hà, tơring čar Lâm Đồng rơbêh 52 klăk prăk, đĭ giăm 2,5 wŏt pơhmu hăng 10 thun hlâo anun; mrô sang anŏ ƀun rin ăt hrŏ truh lu ƀiă dŏ kơnong 1,68%; 100% mrô să homâo tŭ yap plơi pla phrâo; anai lĕ tơring glông tal 5 amăng tơring čar Lâm Đồng hơmâo Khua dêh čar tŭ yap lĕ tơring glông dưi pơgiong hơnong pơkă plơi pla phrâo rơwang thun 2016-2020; hăng pơ-ư ang hơmâo Khua mir sir jao miđai mă bruă mrô III.

Tơlơi bơwih ƀong huă-mơnuih mơnam pơđĭ kyar, tơlơi hơdip mơda mơng mơnuih djuai ania ƀiă ƀơi tơring glông Lâm Hà-kual bơwih ƀong phrâo mơng mơnuih Hà Nội ƀơi Lâm Đồng ăt hơmâo hrưn đĭ. Ơi K’Thể -Kơ-iăng khua anom bruă gru grua, pôr pơhing hăng bơrơguăt drơi jăn tơring glông Lâm Hà brơi thâo, amăng hơdôm tal pơphun ngă yang, ngui ngor, sit biă ñu hơdôm hrơi ngă yang prong amăng ƀon lan, lêng pơdah gru grua mơng mơnuih ƀon sang Hà Nội hăng mơnuih djuai ania ƀiă.

“Anăn “Lâm Hà”- lĕ pơgôp kơplah wah Lâm Đồng hăng Hà Nội, yua anun tơlơi gum pơgôp mơng djop djuai ania amăng tơring glông kjăp biă mă, ăt yua mơng hơdôm hơdră djru mơng Ping gah hăng Kơnuk kơna. Ƀu djơ̆ kơnong mơnuih djuai ania ƀiă đôč ôh mơ̆ Ping gah, Kơnuk kơna ăt čang rơmang djă pioh gru grua yôm phara mơng čing hơgor, djă pioh tơlơi adôh đưm. Čang rơmang Ping gah, Kơnuk kơna đing nao, djru djă pioh gru grua djuai ania. Kiăng tơdơi anai tơlơi bơwih ƀong huă jai pơđĭ kyar, amra mă yua boh thâo phrâo amăng bơwih ƀong huă. Amăng bruă djă pioh gru grua, ƀing gơmơi čang rơmang amra ba nao pơtô hrăm ƀơi hơdôm boh sang hră mơng atông čing truh pơ adôh tơlơi adôh đưm. Tơlơi anai amra pơgôp ngă ƀing čơđai thâo gru grua djuai ania rah, hăng dưi djă pioh gru grua yôm phara mơng djuai ania brơi rơnuk tơdơi”.

Ơi Trần Văn Hiệp, Khua Jơnum min mơnuih ƀôn sang tơring čar Lâm Đồng lăng yôm hơdôm boh than dưi ngă mơ̆ tơring glông Lâm Hà hơmâo gir run amăng hrơi blan laih rơgao, laih dong pơsit tong jơlan hơdră man pơdong plơi pla phrâo jing bruă mă kiăng pơđĭ kyar kơtang, pok prong đơ đam tơring čar, hơmâo djop anih anom kơđi čar hăng mơnuih ƀon sang abih pran jua ngă tui. Đơ đam tơring čar hơmâo 107/111 boh să plơi pla phrâo, 2 boh plơi prong hơmâo pơgiong bruă jao man pơdong plơi pla phrâo hăng 5 boh tơring glông hơmâo tŭ yap dưi ngă pơgiong plơi pla phrâo. Ơi Trần Văn Hiệp brơi thâo:

“Kiăng tŏ tui hơdôm tơlơi dưi, ƀing gơmơi rơkâo pơ anăp anai, tơring glông Lâm Hà kiăng pơtrut pơplih ngă hmua, pơplih hơbô̆ bruă pơđĭ kyar, pơjing hơdôm kual ngă hmua djơ̆ hăng tơlơi rơkâo hiam klă hăng thâo krăn tong ten anih pla pơjing. Ngă tui klă hloh hơdôm tơlơi dưi, tơlơi gal mơng ƀon lan, jak iâu rơnoh tuh pơ alin pơđĭ kyar bơwih ƀong huă-mơnuih mơnam. Pơhlôm bruă pơhrŏ trun ƀun rin hơđong kjăp, pơhlôm brơi tơlơi hơdip mơda. Tŏ tui gru grua gum pơgôp, mơng anun pơgôp lu ƀiă dong, sit nik ƀiă dong amăng pơđĭ kyar hrŏm amăng tơring čar Lâm Đồng.”