Anom bruă Ping gah dêh čar phrâo ba tơbiă tơlơi lăi pơthâo klah čun mơng Khua git gai Ping gah dêh čar ơi Tô Lâm amăng mông mă bruă hăng Ding jum wai lăng bruă mă kơ hơdôm anih anom mă bruă ngă tui bruă jao pơsur ngă hmua ƀơi ƀon lan lơm pok pơhai hơbô̆ bruă gong gai ƀon lan 2 gưl. Tui anun, Khua git gai Ping gah rơkâo hruă kjăp hăng pơmĭn nao djop kơ tơlơi yôm mơng bruă ngă hmua hăng bruă jao pơđĭ kyar ngă hmua amăng pơđĭ kyar bơwih ƀong huă, mơnuih mơnam, man pơdong plơi pla phrâo, hrưn đĭ tơlơi hơdip kơ mơnuih ƀôn sang tui djơ̆ hăng tơlơi pơsit “ngă hmua lĕ tơlơi dưi lŏn ia, anai lĕ anih gơnang nao amăng bơwih ƀong huă”; pơsit tong bruă pơsur ngă hmua lĕ bruă jao akŏ phun amăng gong gai gưl să.

Kơ bruă pơphun, ƀơi gưl tơring čar, ƀôn prong tŏ tui hơdôm anom bruă pơsur ngă hmua, bruă phun lĕ črâo ba, git gai gum hrŏm, pơsur, pel ĕp hăng djru brơi gưl să. Ƀu brơi pok hơdôm anom bruă pơsur ngă hmua kual, pơlir să. Gưl să akŏ pơdong anom bruă ngă tui bruă jao kiăng hloh amăng djop mơta, djop bruă. Hluai tui ƀing apăn bruă pơsur ngă hmua djop gưl ră anai, amra kah pơpha brơi hơdôm boh să kiăng pơhlôm ƀiă biă mă ñu rĭm boh să hơmâo mơng 5-6 čô mơnuih apăn bruă, ƀu đĭ tui mrô biên chế mă bruă gah pơsur ngă hmua. Tŏ tui hơkrŭ, hrưn đĭ tŭ yua bruă mă mơng hơdôm grup pơsur ngă hmua ƀon lan, kơtưn pơtô pơblang, črâo brơi boh thâo, tơlơi găn rơgao amăng ngă hmua, djru brơi, črâo brơi mơnuih ngă hmua pơlir hăng pơđĭ kyar ngă hmua. Hơdôm boh ƀon lan pok pơhai dưm dăp, akŏ pơdong anih anom mă bruă gưl să giong hlâo lơ 30/10/2025.