Gong gai kơnuk kơna hăng mơnuih ƀôn sang Dak Lak čang rơmang tơlơi pơkă phrâo anai, hơmâo jơlan hơdră phara ƀiă pơtrut đĭ kiăng jing anŏ gêh găl prong, djru plơi prong anai tañ jing plơi prong anih anom phun tong krah kual Dap Kơdư tui hăng Hră pơtrun mrô 67 mơ̆ng Ding jum kơđi čar. Tui hăng Gơnong bruă Gru grua Pơrơguăt drơi jăn hăng Tuai čuă ngui  tơring čar Dak Lak: Hră pơtrun anai hơmâo pơsit lông ngă tui hơdôm tơlơi pơkă phara kơ plơi prong Ƀuôn Ma Thuôt, tơring čar Dak Lak wai lăng prăk kăk, prăk kơnuk kơna, pơpha bruă git gai wai lăng amăng bruă pơkă hnong; pơhưč jak iâu tuh pơ alin, djru prăk pơhưč mơnuih rơgơi kơhnâo hăng ƀing thâo bruă glăi mă bruă.

Hrom hăng hrơi anun mơ̆n, ƀơi mông jơnum lok blan 10, jơnum min mơnuih ƀôn sang tơring čar Dak Lak, ơi Phạm Ngọc Nghị, Khua Jơnum min mơnuih ƀôn sang tơring čar Dak Lak rơkâo djop gơnong bruă, djop tơring glông plơi prong sem lăng yơh tơlơi pơkă phara anai, phrâo hơmâo khua mua pơ ala mơnuih ƀôn sang pơsit, kiăng tañ ngă amăng bruă mă, wai lăng mơ̆ng kơnuk kơna hăng gong gai plơi prong phrâo, bơwih brơi kơ mơnuih ƀôn sang klă hloh.