Mah dong ƀơi anăp lu tơlơi tơnap tap lông lăng, kơtang hloh kơ pran jua tŭ añ mơ̆ng ană mơnuih, samơ̆ ling tơhan akă grat mơtah ăt hơđong pran jua, đăo kơnang, khăp kơ jơlan hơdră gơñu ruah mă laih. Ling tơhan puih kơđông pơgang guai dêh čar Ia Mơ, tơring glông Čư̆ Prong, tơring čar Gia Lai ăt hnun mơ̆n, hlăk djă kjăp phao kơtuang ƀơi tơngan, găn rơgao lu tơlơi tơnap tap lông lăng pioh ngă giong bruă mă jao.

Sa hrơi amăng rơnuč blan 9, rơdêh ôtô pơgiăng nao, rôk tui jơlan hyu tir amăng guai dêh čar truh pơ anih dŏ gak mrô1 mơ̆ng puih kơđông tơhan pơgang guai dêh čar či Ia Mơ. Nao amăng jơlan glai, kyâo pơtâo djơ djơr ieo gah, glai mrơ̆k rơ̆k pum lăng tơlĕng khŏp kah hăng brơ̆ng yăk, samơ̆ anŏ mơtah mơda hla kyâo glai ƀơi anăp, pran jua mưn mơak biă mă, tơl wor rơbit hĭ tơlơi pơhiăp, lăi pơthâo mơ̆ng khua apăn bruă kơđi čar Nguyễn Đức Hùng, ră ruai kơ anih dŏ gak 3 mơta ƀu hơmâo: ƀu hơmâo jua pơyiong pơtruh pơhiăp telephôn, ƀu hơmâo ia hơdjă yua, ƀu hơmâo apui lơtrik ôh. Nao čơkă gơmơi lĕ ƀing khua mua, ling tơhan dŏ mă bruă ƀơi anih gak dŏ sa wơ̆t hrơi tơjuh laih. Lăng ƀô̆ mơta djop pô hơtăm ƀlĭk, drơi jăn rơwang găng añrăng kah hăng phun kyâo amăng glai rưng kual Dap Kơdư. Trung tá Rahlan Khŭi, Khua grup pel ĕp gah bruă hră pơar Puih kơđông Ia Mơ lăi lĕ, guai dêh čar amăng bơyan anai, ƀing adơi ayong tơhan pơgang guai dêh čar dŏ hơmâo mơ̆n ia yua, truh bơyan phang, adai pơ-iă kơtang phang khôt, mut amăng puih kơđông hai drơi jăn ƀlĕ ia hô̆ hang mơsah hñip hñap abih drơi jăn. Trung tă Rahlan Khŭi lăi:

"Pơ anai jing anih dŏ gak tơnap tap biă mă, apui lơtrik ƀu hơmâo, ia yua bơyan hơjan mơnơi mă ia krông, ia ania, čroh hnoh. Bơyan phang ƀu hơmâo ia ôh. Kiăng pơhiăp telephôn kơ ană bơnai, ngă bruă hăng khua mua pơ puih kơđông phun ăt khom đuăi nao pơ jơlan čơlah mrô 0 pioh iâu telephôn. Khom gir run baih lah, bruă ping gah, kơnuk kơna jao ƀing adơi ayong pơtong laih tơlơi pơmin pran jua khom hơđong amăng bruă mă”.

Hăng ƀing tơhan pơgang guai, ia yua yôm hloh kơ mah mơtam. Gơñu pơđŭ mă ia hơjan rô ƀơi bơbung sang pioh răk lui či tơñă asơi rim hrơi. Ia yua hin biă mă, apui lơtrik pơpă paih mă hơmâo. Măi pơkĕ apui lơtrik, pioh yua amăng mơmŏt mlăm ƀiă mông, laih anun yua apui čơpit đôč hyu pơčrang. Phrâo anai, arăng dưm truă pơkra pil pơ-iă yang hrơi samơ̆ hlăk dŏ pơkra ming glăi dua blan hăng anai laih.

"Huă amăng rơnưh, pit amăng glai” tơnap tap djơh hăng anun, samơ̆ ƀing khua mua adơi ayong ling tơhan pơgang guai dêh čar či Ia Mơ ăt pơtrut pơsur juh alum tơdruă lĕ: amăng gơnam yua mơ̆ng pô ngă tơhan ƀu hơmâo lăi tơnap tap gun ôh, kơnong hăng pran jua gir run găn rơgao hĭ abih bang". Rim hrơi, tơdơi kơ pơđut bruă mă hyu tir ƀơi guai dêh čar, tơhan akă grat ia mơtah hla kyâo glăi ngă hmua pla añăm pơtam hăng rông mơnŭ, pioh pơjing ming pơkra mă mơnong ƀong huă kiăng jơman ƀiă. Thiếu tá Trần Văn Hạnh, puih kơđông tơhan Ia Mơ lăi:

“Pơđĭ tui bruă mă pla añăm pơtam bơyan hơjan. Bơyan không bơyan phang ƀu thâo pla ôh. Rông lĕ mơnŭ, ngă dơnao phai akan, rông bê amăng puih kơđông, ta wai lăng mă ta pô. Ƀong huă hơmâo prăk blan, gơnam čem rông ling tơhan huăi lơi djop mơ̆n”.

Tong krah amăng glai klô kyâo pơtâo hlip hlap hmư̆ dơnai čĭm huač, arong aruač mơñi dŏ hơmâo mơnŭ kruk, kuk kơtak amăng puih kơđông, jum dar hyơ hyơr hla kyâo mơtah mơda laih anun amăng đang hlip hlap añăm puan, boh pơneh. Puih kơđông rông sa pŭ bê rơbêh 20 drơi pioh čuh ƀong rim hrơi kơ tơhan blah ngă ƀong huă pơđĭ pran kơtang. Thượng tá, Nguyễn Đức Hùng, khua apăn bruă kơđi čar Puih kơđông tơhan pơgang guai či Ia Mơ brơi thâo, puih kơđông Ia Mơ wai lăng, pơgang rơbêh 12,6 km jơlan guai dêh čar sô̆ hăng lŏn ia Kur.

Črăn gơñu wai lăng hơmâo man pơdong pong gai tơmeh hlă pơkă kjăp laih, bruă wai lăng pơgang tơnap tap biă mă yơh. Samơ̆ hăng pran jua mă bruă hur har hloh, pơgang guai lŏn ia hing ang yôm pơphăn, ƀu brơi hơmâo hlơi mut bơrơsua ôh, khua mua ling tơhan pơgang guai dêh čar či Ia Mơ pơmin kjăp na nao, pran jua ai hơtai hơđong kiăng găn rơgao hĭ tơlơi tơnap tap lông lăng đah mơ̆ng ngă giong bruă jao klă hiam hloh. Thượng tá Nguyễn Đức Hùng brơi thâo:

“Tơlơi dŏ dong ƀong huă ƀơi anih dŏ pơgang amăng glai tơnap tap biă mă yơh, smaơ̆ abih bang ƀu hơmâo hlơi bơjang nao rai amăng bruă mă ôh, pơpha bruă hơgĕt khom ngă djơ̆ ƀơi anih gak črăn jơlan guai dêh čar. Ping gah, khua mua puih kơđông juh alum pơtrut pran jua ƀing adơi ayong khom pơblih nao rai mă bruă ƀơi anih hŭi rơhyưt tơnap tap, ƀu lui sa čô dŏ gak sui đơi ôh”.

Găn rơgao lu tơlơi tơnap tap bơyan pơ-iă không kơtang phang khôt, bơyan hơjan hlim adai rơ-ot ƀơi Ia Mơ, hơmâo ƀing ling tơhan pơgang guai dêh čar kjăp pran jua ai hơtai, tơkai tơngan bong glăi pơgang guai lŏn ia, gơñu kah hăng khiơl pơgang brơi tơlơi rơnuk rơnua dmơnuih ƀôn sang êh čar ƀơi akiăng kơ lŏn ia či rơnuč gah yŭ.