Rĭm wŏt truh tal hơdor glăi hrơi blah dưi ƀơi kual Dơnung, pơklaih rơngai lŏn ia ta, ơi Y Nguôm Byă dŏ amăng ƀuôn Dak Tuôr, să Čư̆ Pui, tơring glông Krông Bông, tơring čar Dak Lak hơdor glăi thun blan mut hrŏm blah wang kơdŏng glăi ayăt Mi. Ñu brơi thâo, hlâo adih, grup blah ngă mơng plơi pla tui tơlơi git gai mơng Khua să Y Ơn Niê hơmâo lu wŏt pơgăng glăi, gir run anăm brơi ayăt mă neh met wa nao pơ anih pơƀut. Ama Hoa brơi thâo, mah ƀom mĭn plĕ trun na nao samơ̆ mơnuih ƀôn sang amăng ƀuôn Dak Tuôr ăt gir run ngă đang hmua, djru brơi ƀô̆ đô̆i.

“Kiăng djru brơi tơhan blah wang, djru brơi ƀô̆ đô̆i, ƀing čơđai ngă bruă anet, ƀing pơprong ngă bruă prong anăm hŭi ayăt ôh, ƀing ta khŏm pơklaih rơngai lŏn ia. Ƀơi kual ataih asuek, lu mơnuih djuai ania ƀiă dŏ hơdip samơ̆ ăt gir run kiăng pơkiăo đuăi ayăt”.

Tơdơi kơ hrơi pơklaih rơngai lŏn ia, Ping gah, gong gai, mơnuih ƀôn sang djop djuai ania să Čư̆ Pui ječ ameč rŭ pơdong glăi anŏ răm rai mơng blah wang, gir run pơplông bơwih ƀong huă, pơjing plơi pla jai hrơi pơđĭ kyar. Mơng anih kơƀah asơi huă añăm ƀong, tơlơi hơdip tơnap tap, ră anai lu sang anŏ amăng hrưn đĭ pơdrong asah hăng prăk pơhrui hơdôm rơtuh prăk rĭm thun. Ơi Y Sự Byă dŏ amăng ƀuôn Khanh, să Čư̆ Pui, hok mơ-ak brơ thâo:

“Tơlơi hơdip kơ neh met wa ră anai pơplih pơhmu hăng hlâo adih. Neh met wa ră anai tŭ mă tơlơi gal bơwih ƀong huă amăng kual lŏn blah wang đưm. Đa sa, dua boh sang anŏ mă yua boh thâo phrâo ră anai hrưn đĭ pơdrong asah pơhmu hăng hlâo adih”.

Să Čư̆ Pui, tơring glông Krông Bông, tơring čar Dak Lak hơmâo 13 ƀut plơi pla, hăng 2.700 boh sang anŏ, rơbêh 14.000 čô mơnuih, mơnuih djuai ania ƀiă giăm 90%. Truh ră anai, să kual tơnap tap anai hơmâo apui kơđen pơčrang bơngač rôk jơlan, hơmâo sang hră, sang ia jrao, dơnao pơkŏng ia, ia hơdjă…Ơi Y Kok M’Drang, Khua git gai ping gah să Čư̆ Pui brơi thâo, hrŏm hăng tơlơi đing nao tuh pơ alin mơng Kơnuk kơna, neh met wa amăng să glăk gum tơngan hrŏm man pơdong plơi pla phrâo. Să amra tŏ tui pran gơgrong ba gru mơng mơnuih apăn bruă Ping gah pơtrut pơsur pơplih tơlơi pơmĭn, bruă mă, hrŏm hăng črâo brơi boh thâo phrâo amăng ngă hmua pơđĭ kyar bơwih ƀong huă.

“Đing nao hăng črâo brơi ƀing apăn bruă Ping gah lĕ ƀing mơnuih ba gru amăng pơđĭ kyar bơwih ƀong huă mơnuih mơnam. Hăng tơlơi pơsit “mơnuih apăn bruă Ping gah ngă, mơnuih ƀôn sang kiăo tui tlâo”. Tui tơlơi pơsit anun abih bang monuih apăn bruă Ping gah rơngiao kơ bruă pơjing Ping gah, pơjing anih anom kơđi čar, ƀing gơmơi črâo ba pơđĭ kyar bơwih ƀong huă lĕ phun, kơtưn pran gơgrong amăng pơđĭ kyar bơwih ƀong huă amăng sang anŏ kiăng mut hrŏm pơplih phrâo”.

Ngă tui gru grua hơkrŭ, mơng kual ataih, asuek, kual mơnuih djuai ania ƀiă hơmâo lu tơlơi tơnap tap, să Čư̆ Pui glăk hrưn đĭ kơtang amăng bơwih ƀong mơnuih mơnam kiăng djơ̆ hăng pran sông kơtang djă pioh đưm hlâo adih./.