Tlam lơ 13/10, Jơnum ruah khua ping gah Kơnuk kơna ta sa jơnum pơjưh hĭ laih. Jơnum anai pơsit mă yua Tơlơi pơtrun hăng 100% čô khua tŭ ư. Tơlơi pơtrun Jơnum ping gah pơdah pran jua kơtưn, tơlơi pơmin kjăp mơ̆ng Ping gah Kơnuk kơna amăng rơwang phrâo, gir “Akŏ pơdong Ping gah Kơnuk kơna mă bruă kjăp kơtang; gum pơgôp, ngă gru nao hlâo amăng boh thâo ia rơgơi, pơčeh phrâo, mă yua boh thâo mrô; pơplih kơtang, kơplong đĭ, pơđĭ kyar lŏn ia tañ hăng hơđong amăng rơnuk hrưn đĭ pơdrong sah, rơgơi, hyuk hyak yâo mơak”. Pơƀut git gai khut khăt, dưm kơnar, tŭ yua  djŏp tơlơi gơñăm nao, rơnoh pơkă ba tơbiă hăng 4 mơta hơdră pơsir akŏ pơdong Ping gah; 8 mơta bruă pơsir gah bơwih ƀong huă, mơnuih mơnam; 2 mơta tơlơi pơsir kơ pơgang lŏn ia, rơnuk rơnua, pơtom hiăp hăng čar rơngiao; 6 mơta bruă yôm phun pơđĭ kyar pơplih kơtang.

Gir ngă bruă kiăng hơđong tơlơi bơwih ƀong, pơgăn pơđĭ nua gơnam ča čot, pơhlôm ngă bơkơnar prong mơ̆ng tơlơi bơwih ƀong; pơtrut pơđĭ kyar GRDP hơmâo 10%/ thun truh kơ lu hloh. Čih pơkra giong tơlơi phiăn; pơđĭ kyar anih anom jơlan nao rai kơnar, phrâo, hăng hơmâo mơnuih mă bruă rơgơi. Pơtrut kơtang mă yua boh thâo măi mok ia rơgơi, dăp glăi tơlơi bơwih ƀong, pơčeh phrâo hăng mă yua boh thâo mrô. Lăp đing nao bruă gru grua, mơnuih mơnam, pơgang ba anih anom ayuh hyiăng, pơđĭ tui tơlơi hơdip mơnuih ƀôn sang. Pơplih kjăp tui, pơđĭ tui bruă wai pơgang lŏn ia, rơnuk rơnua, hơđong kjăp mơnuih tơpuôl; pơtom hiăp hăng čar rơngiao, mut hrŏm jar kmar; bong kjăp tơlơi hơdip rơnuk rơnua, hơđong kjăp kiăng pơđĭ kyar lŏn ia tañ hăng kjăp phik.