VOV4.Jarai - Amăng 2 hrơi mơng lơ 21 truh 22/9, Khul hlăk ai rơnuk Hồ Chí Minh tơring čar Dak Nông pơphun jơnum khua mua tal IV, rơwang thun 2022-2027, hơmâo 200 čô mơnuih mơng rơbêh 157.000 čô hlăk ai amăng đơ đam tơring čar. Anai lĕ tơring čar blung a ƀơi kual Dap kơdư pơphun jơnum khul hlăk ai. Tui hră lăi pơthâo amăng mông jơnum, rơwang thun laih rơgao, khul hlăk ai tơring čar Dak Nông dưi ngă hăng rơgao 11/12 hơnong pơkă.

Yôm hloh lĕ bruă gum tơngan hrŏm man pơdong plơi pla phrâo, djop gưl Khul hlăk ai hơmâo pơphun ngă giăm 7.000 ring bruă, bruă hlăk ai hăng anih tih rơbêh 38 klai 430 klăk prăk. Hlăk ai đơ đam tơring čar pơphun hơdôm rơbâo tal hyu pơtô pơblang hăng wai pơgang ayuh hyiăng, hyu duñ pơƀut asuk ruk, pla kyâo rơbêh 700.000 phun djop mơta, man pơkra hăng pơkra ming 127 anih jơnum pơƀut, anih ngui ngor brơi hlăk ai čơđai, ngă tui hơdôm jơlan hơdră djru brơi ƀing čơđai sang anŏ tơnap tap hăng abih tih rơbêh 15 klai prăk.

Siu Đoan: Pơblang