Ha mơkrah akô̆ thun anai, abih bang gơnam (GRDP) ƀơi tơring čar Dak Lak đĭ rơbêh kơ 7%. Abih bang pơhrui ngăn drăp kơnuk kơna ƀơi tơring čar hmâo rơbêh kơ 8.700 klai prăk, đĭ 1/3 bơhmu hăng thun hlâo. Tui hăng ơi Tạ Anh Tuấn, Khua Jơnum min mơnuih ƀôn sang tơring čar Dak Lak, pơ̆ anăp anai lĕ rơwang “pơđĭ kyar, pơplih phrâo” pioh tơring čar dưi ngă djơ̆ rơnoh pơkă pơđĭ kyar 8% amăng sa thun 2025.

Khua Jơnum min mơnuih ƀôn sang tơring čar rơkâo: Pơhrui ngăn drăp kơnuk kơna thun anai khom đĭ ƀiă biă mă ñu 20% bơhmu hăng rơnoh pơkă hlâo, khom pơkrem mă yua na nao. Pơtrut tañ pơsir prăk tuh pơplai bruă hrŏm, biă ñu hơdôm rơwang bruă phun, hơdră anom mă yua, anom mă yua ƀơi să – phường tơdơi kơ pơmut hrŏm. Đing nao pơsir pơđut hơdôm rơwang bruă kaih rơnoh, pơplih bôh tơhnal tuh pơplai. Pơđĭ kyar ha amăng plĕ kual ia rơsĭ – glai klô, hăng hơdôm jơlan hơdră pơgang glai klô, pơđĭ kyar rông akan hơdang, pơplih tơlơi hơdip mơda kơjăp phik kơ mơnuih ƀôn sang kơtuai hang ia rơsĭ hăng kual čư̆ siăng; Pơtrut tañ rơnoh jơlan hơdră lŏm lui sang tơ̆i, sang răm, ngă giong hlâo kơ lơ 30/8/2025./.