Kơčăo bruă čuk pơkra jơlan rơdêh đuăi hmar Quy Nhơn-Plei Ku ataih 125 km, prong djop 4 boh rơdêh nao sa amăng plĕ, rơnoh prăk tuh pơ alin 43.700 klai prăk hăng pơpha jing 3 črăn kơčăo bruă. Amăng anun, kơčăo bruă črăn 3 ataih 35 km, mơ̆ng km 90 truh km 124, rơnoh prăk tuh pơ alin lĕ 9.100 klai. Jơlan anai găn nao pơ 6 boh să, phường kah hăng Lơ Pang, Mang Yang, K’dang, Đak Đoa, Ia Ƀăng hăng Hội Phú; jơlan anai amra giong amăng thun 2029.

Pơhiăp amăng mông jơnum, ơi Phạm Anh Tuấn-Khua Jơnum min mơnuih ƀôn sang tơring čar Gia Lai brơi thâo, jơlan 19 ră anai jing jơlan phun rô nao rai pơtruh kual yŭ hăng ngŏ tơring čar Gia Lai tơdơi kơ dăp glăi, pơmut hrŏm sang bruă kơnuk kơna, rek glăi ling guai wai lăng, samơ̆ ăt dŏ lu tơlơi gun yua jơlan găn čư̆ čan, čun čue, rô nao rai dŏ hŭi hơmâo tơlơi truh, anun yơh sa tơlơi dŏ kơđông lơ̆m pơtrut tơlơi bơwih ƀong huă pơđĭ kyar mơnuih mơnam. Laih jơlan anai dưi čuk pơkra giong, bruă rô nao rai plah wah Quy Nhơn hăng Plei Ku amra tañ hloh, pơhrŏ hĭ ha mơkrah rơnoh prăk apah, huač soh sel, rơngiă mông mơnit, pơđĭ tui boh tŭ yua pơtruh nao rai amăng lu kual Yŭ -Ngŏ, pơtruh nao rai Kơdư trun pơ Dơnung, tơdron rơdêh por, tơdrun kom pan hăng amăng jang jơlan guai dêh čar ƀơi Lệ Thanh, mơ̆ng anun pơtrut tơlơi bơwih ƀong huă pơđĭ kyar mơnuih mơnam hăng pơđĭ tui tơlơi hơdip mơda mơnuih ƀôn sang. Tơring čar Gia Lai pơtrun hiăp djop sang bruă čuk pơkra jơlan khom pơkra brơi hiam, kơjăp, djơ̆ hnơ̆ng pơkă sit răm pơkra glăi amăng 5 thun ƀu mă prăk ôh.