Tơring čar Kon Tum hăng Attapư hơmâo jơlan guai glông rơbêh 75 km hăng đơ đam glai rưng giăm guai prong giăm 39.000 ektar. Glai rưng ƀơi anai tơnap găn nao rai, pơčlah kual plơi pla, amăng glai lu hlô mơnong, kyâo pơtâo yôm yua anun amra ƀuh mơnuih hyu trơ̆i dŏp ngă soh amăng bruă wai pơgang glai rưng. Rơwang thun 2024-2025, gơnong bruă ngă hmua hăng pơđĭ kyar ƀon lan tơring čar Kon Tum hăng gơnong bruă ngă hmua, đang glai tơring čar Attapư tŭ ư tŏ tui kơtưn ngă hrŏm, pơlăi nao rai tơlơi thâo thăi, tơlơi găn rơgao amăng wai lăng, pơgăn ƀing hyu trơ̆i mă kyâo ča čot; ngă hrŏm amăng pơgang hŭi apui ƀong glai rôk tui jơlan guai dua boh tơring čar.

Hơmâo thâo mơng thun 2016, gơnong bruă ngă hmua hăng pơđĭ kyar ƀon lan tơring čar Kon Tum hăng gơnong bruă ngă hmua, đang glai tơring čar Attapư sit nik ngă hrŏm wai pơgang glai ƀơi kual giăm guai găn nao dua boh tơring čar. Kơnong rơwang thun 2019-2023, tơhan wai lăng glai rưng tơring čar Kon Tum hơmâo pơphun 600 tal hyu tir, ƀuh 35 wŏt tơlơi ngă soh hăng tơlơi phiăn wai lăng glai rưng. Anom bruă bơdjơ̆ nao tơring čar Attapư ăt pơphun 79 tal hyu tir, mă pơkŏng, pơhrui glăi rơbêh 48 met khối kyâo, sa, dua drơi hlô mơnong hăng lu gơnam amăng glai rưng pơkŏn dong.