Mơguah lơ 3/11, ƀơi plơi prong Kon Tum, ƀing khua mua tơring čar Kon Tum hăng tơring čar Sê Kông, dêh čar Lao hơmâo mông mă bruă kiăng lăng glăi boh than ngă hrŏm amăng thun blan laih rơgao hăng kĭ hră pơkôl ngă hrŏm rơwang thun 2022-2027. Jơnum min mơnuih ƀon sang tơring čar Kon Tum hăng gong gai tơring čar Sê Kông hơmâo kĭ hră pơkôl hơmâo 7 mơta amăng ngă hrŏm dua boh tơring čar rơwang thun 2022-2027.

Tui anun, Kon Tum hăng Sê Kông tŏ tui ngă hrŏm kjăp amăng pơhlôm rơnuk rơnua, pơjing kual giăm guai hơđong, ngă hrŏm hăng pơđĭ kyar djop mơta; ngă tui djop mơta hơdôm bruă pơsur tuh pơ alin sĭ mơdrô, pơsur tuh pơ alin mơng tơring čar, ĕp tơlơi dưi phrâo amăng tuh pơ alin hăng pok pơhai akŏ bruă ƀơi 2 boh tơring čar.

Mơng anun amra ngă gêh gal kiăng čơđai sang hră mơng tơring čar Sê Kông nao hrăm hră ƀơi hơdôm boh sang hră pơ tơring čar Kon Tum tui jơlan hơdră hrăm gưl prong rơwang thun 2024-2029 hăng brơi ƀing apăn bruă, čơđai sang hră tơring čar Kon Tum nao hrăm hră ƀơi hơdôm boh sang hră pơ dêh čar Lao tui jơlan hơdră pơtô hrăm bruă mă ƀiă hrơi; pơsur pơphun pơlir ba hyu tuai čuă ngui kiăng tŭ mă hơdôm tơlơi dưi amăng bruă bơwih brơi tuai čuă ngui tui Jơlan bơwih ƀong hrŏm kual Ngŏ-Yŭ…