Thun hrăm 2024-2025 tơring čar Kon Tum hmâo rơbêh kơ 167.000 čô čơđai muai, čơđai sang hră, amăng anun hmâo rơbêh kơ 98.000 čô čơđai muai, čơđai sang hră djuai ania ƀiă. Mơ̆ng lơ 12/8, kơnong kơ ƀing čơđai anih sa djuai ania ƀiă mơ̆ng tơring čar pioh nai pơtô ba nao pơtô tơlơi Yuan djru ƀing čơđai hmâo dong pran đăo kơnang mut thun hrăm phrâo. Ƀơi hơdôm bôh plơi pla, amĭ ama ƀing čơđai sang hră ăt pioh mơn tơlơi lăng ba truh rơnuk pơgi kơdih anai. Amai Y Hrâm, ƀơi plơi Kon Vơng Kia, tơring kual Măng Đen, tơring glông Kon Plông, brơi thâo:

 “Prăp lui mut thun hrăm phrâo, sang anô̆ kâo hmâo bơwih brơi blơi prăp kơ ană bă sum ao, tơkhŏ jep, kơdung hră, gai čih, hơdrôm hră, hră čih… Sang anô̆ ăt prăp lui mơn prăk hrăm akô̆ thun hăng blơi prăp djop gơnam yua pioh hrăm hră. Jơlan nao mơ̆ng sang truh pơ̆ sang hră ăt ataih mơn anun sang anô̆ ăt hmâo prăp lui mơn rơdêh kơ pô pioh ba ană hăng čơkă ană glăi mơ̆ng sang hră hơđong, čang rơmang ană pô amăng thun phrâo hrăm rơgơi”./.