Gum hrŏm ngă Lơphet ƀing khua pơ ala pioh laih sa mơnit rơngôt kơ mơnuih djai hăng ƀing mă bruă tơhan rơngiă amăng mông dô̆ mă bruă pơtlaih brơi mơnuih ƀôn sang yua kơthel ia ling dăo ngă. Amăng mông ngă lơphet pok phun, lu khul grŭp, mơnuih ăt hmâo rơkâo gum djru, amăng anun lu hloh lĕ mơnuih apăn bruă hăng mơnuih ƀôn sang plơi prong Kon Tum djru 400 klăk prăk.

Ping gah tơring čar, Khul khua pơ ala mơnuih ƀôn sang, Jơnum min mơnuih ƀôn sang, Jơnum min djop djuai ania mơnuih mơnam dêh čar Việt Nam tơring čar Kon Tum iâo pơthưr mơnuih apăn bruă, mơnuih ƀôn sang amăng tơring čar gum pơčruh djru mơnuih ƀôn sang hơdôm bôh tơring čar, ƀôn prong gah kual Kơdư dêh čar răm rai yua kơthel tal 3 ngă; pơsur hơdôm gưl, hơdôm gơnong bruă, hơdôm ƀirô, khul grŭp, mơnuih hăng djop gưl mơnuih ƀôn sang, hăng bruă mă sit nik, hăng pran jua gum djru hăng tơlơi gum hrŏm hơbit djru klă pioh neh wa răm rai yua kơ kơthel tal 3 ngă tañ yak rơgao tơlơi tơnap, hơđong tơlơi hơdip mơda./.