Rơbêh kơ sa blan hăng anai, nai Čil Kồng, nai pơtô Sang hră gưl 3 Lang Biang, tơring kual Lạc Dương, tơring glông Lạc Dương, tơring čar Lâm Đồng pioh lu mông kơsem min, dăp giong hơdră pơtô hăng pơhrua nao sa dua bôh yôm phrâo tui jơlan hơdră pơtô pơhrăm. Ñu brơi thâo kiăng djơ̆ tui klă bruă pơtô pơhrăm, ƀing nai pơtô čơđai leng kơ gum hrŏm tum djop hơdôm anih pơhrăm, prăp lui yak mut thun hrăm phrâo 2024-2025:

“Thun hrăm phrâo anai, sang hră mă yua jơlan hơdră pơtô pơhrăm thun 2018. Nai pơtô čơđai ƀing gơmơi hmâo prăp lui djop laih hơdôm bôh yôm kiăng djơ̆ tui tơlơi pioh pơtô pơblang. Rơngiao kơ pơhrăm giong mă yua hơdrôm hră hrăm, jơlan pơtô pơhrăm, pel ĕp pơsit tui jơlan hơdră pơsit jơlan gah phrâo, ƀing gơmơi hơkrŭ đĭ bôh thâo bruă juăt mă, ngă giong tơlơi pơblang pơtô, hră čih dăp hơdră amăng pran gơgrong yak mut thun hrăm phrâo. Pơhlôm bruă pơtô hăng pơhrăm mơ̆ng sang hră ba glăi bôh tơhnal klă hloh”.

Hrŏm hăng bruă hrưn đĭ klă dong amăng pơtô hrăm brơi ƀing nai pơtô, sang hră gưl tlâo Lang Biang ăt hơmâo pơkra ming sang hră, tuh pơ alin blơi gơnam măi mok djop kiăng pơhlôm brơi bruă pơtô hrăm djơ̆ hăng tơlơi rơkâo tui jơlan hơdră pơtô hrăm phrâo thun 2018. Tui ơi Hoàng Viết Phương, kơ-iăng khua sang hră, thun hrăm phrâo sang hră hơmâo 14 anih hrăm hăng rơbêh 600 čô čơđai sang hră, amăng anun čơđai sang hră djuai ania ƀiă giăm ha mơkrah. Hrŏm hăng bruă pơhlôm klă brơi kơ bruă pơtô hrăm, sang hră ăt đing nao pơkra ming sang dŏ, pơhlôm brơi anih ƀong huă, anih dŏ brơi ƀing čơđai djuai ania ƀiă.

“Sang hră hơmâo anih dŏ glăi tui hơdră brơi dŏ pơdơi yang hrơi djơ̆ hăng tơlơi rơkâo dŏ glăi brơi ƀing čơđai kual ataih, asuek, anun lĕ mơng să Lát hăng Đưng K’Nớ, hăng giăm 80-100 čô čơđai. Hrŏm hăng anun, sang hră ăt ngă klă amăng bruă jak iâu gum pơgôp djru kơ bruă hrăm hră, jak iâu pơgôp blơi gơnam yua bơrơguăt drơi jăn, blơi abăn, mông sơker brơi čơđai đih pơdơi yang hrơi. Kơnuk kơn ăt đing djru brơi ƀing čơđai lu hloh, tuh pơ alin djop gơnam mă yua amăng sang dŏ glăi”.

Ƀơi tơring čar Dak Lak, hlâo kơ thun hrăm phrâo, amăng tơlơi mơ-ak nao sang hră, nai pơtô čơđai, čơđai sang hră kual asuek, ataih, kual tơnap tap mơ̆ng tơring čar hmâo dong tơlơi mơ-ak lơm hrăm hră amăng hơdôm bôh sang hră, anih hrăm phrâo dưi pơdŏng klă hiam, agaih hiam. Ơi Lê Ngọc Quyết, Khua Sang hră gưl sa Kon Đồng, să Čư̆ Kbang, tơring glông Ea Sŭp, tơring čar Dak Lak brơi thâo, Čư̆ Kbang lĕ să tơnap tap, 95% mrô čơđai sang hră lĕ djuai ania ƀiă. Phrâo tom adih anai, sang hră dưi hmâo tơring glông tuh pơplai pơdŏng sang hră 2 tal hăng 10 bôh anih hrăm, pơnăng war, lan sang hră tuh ƀê tông.

 “Sang hră mơ-ak biă hơdôm bôh anih hrăm tui anun pơhlôm mơguah čơtlăm sa hrơi Sang hră hrưn đĭ abih thun 2024 amra djơ̆ tui rơnoh pơkă sang hră klă 1”.

Hăng tơring glông kual ataih Krông Bông, tơring čar Dak Lak, dŏ lu tơnap tap, tơring glông hơmâo gir run jak iâu pơgôp kiăng pơkra ming sang hră, blơi gơnam măi mok pơhlôm prap lui klă amăng thun hrăm phrâo. Ơi Y Thức Êban, Kơ-iăng Jơnum min mơnuih ƀôn sang tơring glông Krông Bông, brơi thâo:

“Jơnum min mơnuih ƀôn sang tơring glông hơmâo git gai anom bruă pơtô hrăm gum hrŏm hăng djop ƀon lan kah hăng hơdôm anih anom pel ĕp glăi gơnam măi mok pioh yua pơtô hrăm ƀơi djop sang hrăm amăng tơring glông. Hơget kiăng pơkra hlâo, hơget tơdơi, pơhlôm brơi lăp blơi yua lăp djơ̆, tơdah aka ƀu djop prăk blơi gơnam amra pơhlôm tui ƀơƀrư̆”.

Thun hrăm 2024-2025, hăng anăn ñu “Tơlơi gơgrong, pơplih phrâo ƀu pơdơi, pơđĭ dlông anô̆ kơjăp”, tơring čar Dak Lak hrưn đĭ abih bang plơi hmâo sang hră, anih wai lăng čơđai anet; mrô anih hrăm kơjăp hmâo 93%, mrô sang hră djơ̆ tui dêh čar pơkă rơbêh kơ 60%./.