Truh mông anai, tơring glông Krông Pač hmâo pơsir laih hăng jao laih kơ hơdôm bôh anom man pơkra 161 ektar lŏn, dưm dưm hăng 76%, kual lŏn hmâo jao prong hloh bơhmu hăng hơdôm bôh tơring glông dô̆ glăi hmâo rơwang bruă găn nao.

Yă Ngô Thị Minh Trinh – Kơ-iăng Khua Jơnum min mơnuih ƀôn sang tơring glông Krông Pač brơi thâo, kiăng pơhlôm jao anih anom man pơkra djơ̆ rơnoh, hơdôm hrơi rơgao, Jơnum min mơnuih ƀôn sang tơring glông hmâo đing nao črâo ba hơdôm anom bruă, jơnum min, hơdôm bôh să hmâo lŏn amăng kual rơwang bruă pơtrut rơnoh bruă pơsir anih anom pioh man pơdŏng, pơhlôm akô̆ tlôn, hơdră pơkă, hơdră bruă tui tơlơi pơkă amăng tơlơi phiăn, ƀu pioh hmâo tơlơi ƀom kiơng. Rơwang bruă jơlan đuăi hmar Khánh Hòa – Buôn Ma Thuột găn dua bôh tơring čar Dak Lak hăng Khánh Hòa, abih bang rơwang ataih rơbêh kơ 117 km, amăng anun črăn găn tơring čar Dak Lak ataih giăm truh 85 km, găn hơdôm bôh tơring glông Mdrak, Krông Bông, Ea Kar, Čư̆ Kuiñ hăng Krông Pač./.