Têt ƀơi Trường Sa ƀu hơmâo tơpai,ƀiêr, ƀu hơmâo djup hot ôh, ăt ƀu hơmâo mlăi ƀơt čuh lơi samơ̆ mơak hăng pơđao biă mă yua tơlơi khăp tơdruă adơi ayong ling tơhan dŏ sa boh sang, pơlir hơbit tong ten. Hơdră ngui ngor dŏ tơguan mơak hloh lĕ, ƀơi bul pơtâo ia rơsĭ ataih mơ̆ng hang kiăng hmư̆ hơdră adoh suang yua ƀing khua mua, adơi ayong hăng mơnuih ƀôn sang dŏ amăng bul pơtâo ia rơsĭ. Amăng sang jơnum pơđao mơak, djop mơnuih adoh hrŏm tơlơi adoh gum pơgôp djuai ania, pơdah rai pran jua mă bruă khut khăt pơgang guai lŏn ia amăng bul pơtâo plao ia rơsĭ yôm pơphăn mơ̆ng dêh čar. Trung tá Đặng Văn Tài, khua apăn bruă kơđi čar, kơ-iăng khua git gai bul pơtâo ia rơsĭ Song Tử Tây brơi thâo: Thun anai lĕ thun tal dua ñu čơkă têt ƀơi bul pơtâo ia rơsĭ. Mah ataih mơ̆ng sang anŏ hai,samơ̆ rim wơ̆t ƀong têt ƀơi bul pơtâo ia rơsĭ jing sa tơlơi mơak hing ang hăng bruă ngă găn rơgao ñu amra ƀu thâo wor rơbit ôh.

“Tết pơ anih plao ia rơsĭ ăt hơmâo djop ayuh pơđao mơ̆ng lŏn hang ba nao, hơmâo phun boh kruăi kuât, ƀañ tek. Anai lĕ tơlơi khăp mơ̆ng ană plơi pla, sang anŏ, mơnuih mơnam mơ̆ng lŏn hang ba brơi kơ ƀing tơhan dŏ ƀơi bul pơtâo ia rơsĭ. Tơlơi lir hơbit kjăp tong ten kiăng pơtrut pran jua kah pơpha nao rai hăng khua mua ling tơhan dŏ pơ ataih amăng ia rơsĭ djă phao kơtuang kjăp ƀơi tơngan pơgang guai dêh čar, bul pơtâo ia rơsĭ lŏn amăng atur ia rơsĭ gah dehe čar ta ngă pô”.

Hăng ƀing tơhan dŏ hlăk ai hloh čơkă têt ataih mơ̆ng sang anŏ sa tơlơi lăp hơdor biă mă. Gơnam djă ba nao pơ bul pơtâo  ia rơsĭ mơ̆ng sa čô tơhan lĕ rup mơ̆ng sang anŏ plơi pla, amĭ, ama, adơi ayong. Anun yơh anŏ pơtrut pran jua, kiăng kơtang djru kơ sa čô tơhan khin hơtai, hơđong dŏ mă bruă ƀơi bul pơtâo plaoia rơsĭ ataih. Tơhan Hà Quang Huy plơi pla pơ Khánh Hòa ră ruai: Tal blung a čơkă têt ƀơi kual bul pơtâo ia rơsĭ pran jua pơmin phara biă mă ƀu thâo pia ôh. Samơ̆ yua ta hlăk ai kiăng pơhrăm drơi jăn pran jua kơtang anun Huy hok mơak pơ-ư ang kơ tơlơi anun, ñu lăi:

“Ăt hning mơ̆n samơ̆ yua bruă khom ngă anun gir run. Kâo kiăng mơ-it kơ amĭ ama hăng gơyut gơyâo, adơi ayong dŏ pơ sang anŏ, plơi pla hơđong pran jua yơh, yua gơmơi pơ gah rơngiao anai, dŏ amăng kual bul pơtâo ia rơsĭ hơmâo khua mua wai lăng hăng ƀing gơ̆p tơhan djru ba lu mơta klă mơ̆n. Kâo čang rơmang pơ sang anŏ, plơi pla amĭ ama hơđong pran jua tơdơi kơ dua thun ngă tơhan, abih thun amra ngă bruă hiam klă, ngă giong bruă jao sa čô tơhan kâo ăt glăi hăng amĭ ama mơ̆n”.

Bơ tơhan Nguyễn Hữu Em, ăt plơi pla pơ tơring čar Khánh Hòa mơ̆n lăi,mah dŏ ataih mơ̆ng sang anŏ hning rơngôt mơ̆n samơ̆ anai lĕ tal ƀong têt lăp hơdor biă mă amăng tơlơi hơdip kâo.

“Pran jua kâo mông anai rơngôt mơ̆n smaơ̆ hơmâo ƀing adơi ayong dŏ hrŏm mơak mơ̆n ngui ngor ƀong têt ataih mơ̆ng sang anŏ. Hrŏm ƀing adơi ayong anung ƀañ tek, ƀañ čưng, hlă bơnga dar. Hlâo adih dŏ pơ sang lĕ hơmâo mơnuih amăng sang anŏ soh yơh ngă, kâo huăi ngă bruă hơgĕt ôh, samơ̆ ră anai rai pơ anai ta khom ngă hrŏm ƀing adơi ayong kiăng mơak. Kâo bơni hơ-ơč kơ amĭ ama mơak klă hiam drơi jăn dŏ pơ sang anăm bơngơ̆t kơ gơmơi ôh. Pơpŭ kơ amĭ ama ƀong têt čơkă thun phrâo mơak, bă blai tơlơi suaih pral trơi pơđao”.

Ayong Cao Văn Giáp, Kơ-iăng khua să bul pơtâo Song Tử Tây brơi thâo; ƀing ling tơhan hăng mơnuih ƀôn sang dŏ ƀơi bul pơtâo ia rơsĭ čơkă têt tañ hloh, lơ̆m hơdôm boh ƀattô pơgiăng ba tơlơi khăp pap mơ̆ng lŏn hang dêh čar, djă ba hla pŏ ƀañ, hla hơbơi kiăng, braih điơ̆, bơnga đào, bơnga dar kơñĭ hăng wơ̆t ƀưh bơnga phun boh kruăi kuât hiam klă….Amăng mlam čơkă thun phrâo, ăt mơak mơ̆n amăng bul pơtâo ia rơsĭ, ling tơhan hăng mơnuih ƀôn sang mă tơngan tơdruă mơak mơai, puăi tlao hok mơak pơpŭ nao rai tơdruă sa thun phrâo hiam drơi jăn hăng mă bruă hơmâo boh tŭ yua.

“Pơ anai, ƀing adơi ayong tơhan hăng mơnuih ƀôn sang lêng kơ sang anŏ ƀing gơmơi soh laih anun kâo ăt jing mơnuih sang anŏ gơñu mơ̆n. Hrơi mông mơak čơkă thun phrâo ăt kah hăng djop anih amăng dêh čar mơ̆n, ƀu kơƀah mơnong hơgĕt ôh, hơmâo ƀañ tek ƀañ čưng, bơnga đao, bơnga dar kơñĭ. Pơ sang anŏ čơkă thun phrâo jơngum jum dar dŏ ber ƀơi tơpur apui, ƀing gơmơi hyu pơpŭ thun phrâo bơkuar nao rai tơdruă puăi tlao mơak, juh alum pơtrut pran jua mă bruă. Ƀơi anŏ dlưh pran jua tơl ƀlĕ ia mơta, bơhia hning glăi amĭ ama”.

Sang anŏ, amĭ ama, ană bơnai, adơi ayong phung wang dŏ pơ plơi pla hơđong pran jua. Ƀing tơhan phrâo mut ăt hnun mơ̆n hăng ƀing tơhan sui thun khua tơhan tong ten hơdôm hơpluh thun buh sum ao tơhan dŏ mă bruă amăng kual ia rơsĭ ăt hnun mơ̆n. Thượng tá Nguyễn Văn Khương, apăn bruă kơđi čar bul pơtâo Song Tử Tây pơ-ư ang lăi: Plơi pla yơh anih kơnang kjăp, pioh kơ djop mơnuih ngă tơhan dŏ pơ anih kual ataih anăp glăi:

“Rơngiao kơ tơlơi bơni hơ-ơč hrơi ngă yang thun phrâo, ƀong têt, rơngiao kơ gơnam djru mơnong ƀong huă lĕ, hră mơ-it čih glăi kơ ană bơnai pơđok ngui kiăng thâo kơ mông mơak čơkă têt thun phrâo mơ̆ng ană rơkơi dŏ pơ kual ataih mơ-it glăi, pô ama ƀong têt ataih mơ̆ng sang anŏ, mưn amăng pran jua tơlơi pơmin mơ̆ng ama”.

Ayong Khương ăt kah hăng lu adơi ayong ling tơhan pơkŏn mơ̆n gơñu thâo hluh tong ten lĕ, tơlơi pơmin mơ̆ng rim čô tơhan anăp glăi kơ sang anŏ, hơmâo tơlơi hning rơngôt kơ ană bơnai, plơi pla samơ̆ abih bang yua kơ bruă mă yôm pơphăn kiăng pơgang guai lŏn ia dêh čar khăp ƀu-eng. Dêh čar amăng pran jua rim čô mơnuih djuai ania Việt lĕ sang anŏ, amĭ ama, mơnuih amăng sang anŏ. Anun yơh, têt hăng ƀing tơhan dŏ pơ ataih lĕ sa tơlơi pơ-ư ang, djă phao kơtuang kjăp kiăng pơgang lŏn ia kual ia rơsĭ, kual adai rơngit dêh čar, brơi kơ bơyan phang ngă yang thun phrâo ƀơi plơi pla Việt Nam mơak mơai, trơi pơđao rơnuk rơnua.