Thun blan laih rơgao, bruă pok pơhai ngă tui jơlan hơdră tơhnal pơkă mơ̆ng dêh čar hơmâo lu boh tŭ yua yom, pơtrut pơsur djru hrŏm pơđĭ kyar tơlơi bơwih ƀong huă kơ mơnuih mơnam lŏn ia. Jơlan hơdră tơhnal pơkă mơ̆ng dêh čar man pơdong plơi pla phrâo, Jơlan hơdră tơhnal pơkă mơ̆ng dêh čar kơ pơhrŏ ƀun rin hơđong kơjăp mơ̆ng thun 2021-2025 hơmâo ngă giong hăng lu hloh rơnoh pơkă, tơhnal pơtrun; Jơlan hơdră tơhnal pơkă mơ̆ng dêh čar pơtrut pơđĭ kyar bơwih ƀong huă kơ mơnuih mơnam kual djuai ƀiă hăng čư̆ siăng črăn I mơ̆ng thun 2021-2025 hơmâo ngă giong 6/9 khul bruă pơtrun.

Lăi pơtong kơ boh yom phun mơ̆ng 3 jơlan hơdră tơhnal pơkă mơ̆ng dêh čar lêng kơ pơtlep tong ten pơđĭ kyar plơi pla, tơlơi bơwih ƀong huă, jơlan glông, ƀing ƀun rin hăng pơblih đĭ tui tơlơi hơdip mơda mơnuih ƀôn sang kual plơi pla čư̆ siăng, hơdôm tơlơi pơgôp hiăp hơmâo lăi lĕ, bruă pơmut hĭ 3 jơlan hơdră anai djơ̆ găl mơ̆n, pơhlom anŏ ngă tui sa hnơ̆ng amăng bruă git gai wai lăng, pơdjru nao rai khul mă bruă, pơđĭ tui boh tŭ yua tuh pơ alin, tŭ ư sa hnơ̆ng kơ tơhnal pơkă či ngă, tơlơi phiăn pioh tuh pơ alin, hơdră pơčrâo ba ngă tui hăng krăo lăng, laih dơ̆ng kiăng plai ƀiă pơrơkua nao rai, pơđĭ tui boh tŭ yua sit mă yua prăk kăk, kông ngăn kơnuk kơna. Kơ bruă lir hơbit anai, Kơ-iăng khua dêh čar  ơi Nguyễn Hòa Bình pơtrun hiăp ăt djă hnơ̆ng đôč hơdôm tơhnal pơkă mơ̆ng dêh čar, ƀing hơmâo anăn či djru ba, jơlan hơdră tơlơi pơtrun dưi hơmâo khua pơ ala mơnuih ƀôn sang dêh čar pơsit brơi abih 3 Jơlan hơdră phrâo ƀu tơguan čih dăp glăi, huăi pơsit glăi ôh. Anom bruă git gai mơ̆ng 3 jơlan hơdră anai lĕ, Kơnuk kơna dêh čar; Ding jum prăk kăk pô pơphun bruă či ngă hrŏm hơbit.