Lơ 6/7, ƀơi Brazil, Khua dêh čar ơi Phạm Minh Chính pơhmư̆ mông Jơnum prong BRICS pok prong thun 2025 hăng hơmâo tơlơi pơhiăp yôm ƀơi mông Jơnum bơkơtuai BRICS pok prong kơ “Pơđĭ tui tơlơi ngă hrŏm lu bơnah, hơdôm bruă bơwih ƀong huă - prăk kăk hăng tơlơi rơgơi pơčeh phrâo”. Mông bơkơtuai hơmâo 35 čô khua git gai lŏn ia hăng ƀing pơ ala mơ̆ng hơdôm boh dêh čar ding kơna, hơdôm boh dêh čar ngă gŏp hăng ƀing tuai yua BRICS jak iâu, hrŏm hăng khua mua hơdôm anom bruă jar kmar kah hăng Sang gum hơbit djŏp dêh čar, Anom bruă sĭ mơdrô rŏng lŏn tơnah (WTO), Anom bruă ia jrao rŏng lŏn tơnah (WHO), hơdôm anom bruă prăk kăk đĭ kyar mơ̆ng jar kmar hăng amăng kual.

Pơhiăp ƀơi mông jơnum, Khua dêh čar ơi Phạm Minh Chính lăi nao tơlơi gơgrong bruă hăng tơlơi gum pơgôp mơ̆ng hơdôm boh dêh čar gah dơung amăng bruă wai lăng rŏng lŏn tơnah. Khua dêh čar ba tơbiă klâo mơta tơlơi yôm phun, sit nik amăng bruă ngă hrŏm lu bơnah kiăo tui tơlơi pơkă mơ̆ng Phiah phiăn Sang gum hơbit djŏp dêh čar hăng tơlơi phiăn jar kmar, pơtrut sĭ mơdrô rơngai, pơpŭ kơ tơlơi dưi, tơlơi gêh gal mơ̆ng hơdôm boh dêh čar; pơtrut tui tơlơi kơtang mơ̆ng ia rơgơi ană mơnuih pơčeh (AI) či bơwih brơi ană mơnuih.