Tơlơi pơhing hơmâo Ding jum bruă hmua hăng ayuh hyiăng ba tơbiă ƀơi mông Jơnum “Pơhrua tơlơi pơhing hơdôm tơlơi pơkă kơ hơdjă mơnŏng ƀong huă hăng pơgang klin ƀơi hlô mơnong, phun pla amăng Hră kĭ pơkôl Gŏp ngă hrŏm Bơwih ƀong huă Abih bang Kual (RCEP) laih anun Tơlơi pơčrâo trun mrô 280 mơ̆ng dêh čar Khač” lơ 14/5. Mông jơnum pơphun ƀơi Dak Lăk laih anun jơnum mơ̆ng ataih hăng 34 bit anih ƀơi gơnong dlông hrŏm hăng hơdôm boh tơring čar, ƀôn prong. Tui hăng tơlơi lăi pơthâo, hrơi blan rơgao, hơdôm anom bơwih ƀong kiăo tui tơlơi pơplih ƀơi anih mơdrô, pơkra klă hơdôm gơnam hơmâo rơkâo blơi.

Hơdôm anih pơkra gơnam glăk gir pơkra mrô kual pla, pơčrang klin kman, laih anun pơsit gơnam anun hơmâo pơkra mơ̆ng pă, đah mơ̆ng kiăo tui tơlơi pơkă phrâo mơ̆ng anih blơi, biă ñu lĕ tơlơi pơkă mơ̆ng hơdôm hră kĭ pơkôl sĭ mơdrô. Khă hnun, gơnam mơ̆ng hmua Việt Nam glăk bưp tơlơi tơnap mơn gah bruă boh thâo ia rơgơi wai lăng hơdjă rơgoh mơnong ƀong huă hăng pel ĕp pơčrang kman. Biă ñu, gah dêh čar Khač glăk wai lăng kjăp mơnong ƀong huă blơi mut, pơƀut ĕp kual pla, anih anung amăng kơdung, wai lăng rơnoh ia jrao pơgang phun pla amăng gơnam ƀong huă, hruh, gru kơdung hăng pel ĕp rơđah anih pơkra gơnam. Jơnum anai brơi thâo tơlơi pơhing, tơlơi pơkă phrâo kơ hơdjă rơgoh gơnam ƀong huă hăng pơčrang klin kman ƀơi hlô, ƀơi phun pla (SPS) amăng Hră kĭ pơkôl ngă hrŏm bơwih ƀong huă abih bang amăng kual; Tơlơi pơčrâo trun mrô 280 hăng hơdôm tơlơi lăi pơthâo mơ̆ng Anom bruă wai lăng rô nao rai hăng čar rơngiao dêh čar Khač kơ wai lăng čih anăn anom bơwih ƀong pơkra gơnam ƀong huă dêh čar tač rơngiao blơi mut amăng dêh čar Khač, kiăng anom bruă wai lăng, anom bơwih ƀong, anom ngă ƀong hrŏm, mơnuih ngă hmua thâo hluh hăng ngă tui, pơhlom ngă djơ̆ tơlơi ba tơbiă./.