Tui hăng tơlơi lăi pơthâo ƀơi mông jơnum, Khua ding jum Man pơphô hăng tuh pơ alin Nguyễn Chí Dũng brơi thâo, tơlơi bơwih ƀong huă mơnuih mơnam blan 9, 3 blan tal 3 hăng 9 blan thun 2023 đĭ kyar, laih dong črâo pơƀuh 10 mơta tơlơi hmư̆ hing, amăng anun lăi pơtŏng: Rơnoh đĭ kyar hơmâo đĭ glăi, qúi tơdơi lu hloh kơ qúi hlâo, yap abih bang amăng 9 blan đĭ 4,24%, dong amăng grup dêh čar đĭ kyar lu amăng kual hăng ƀơi rŏng lŏn tơnah. Hơdôm bruă yôm phun hơmâo rŭ glăi, pơđĭ kyar hơđong, biă ñu bruă pơkra gơnam măi mok hơmâo đĭ glăi. Ƀơi mông jơnum, khua mua hơdôm ding jum anom bruă bơni biă kơ bruă git gai wai lăng mơ̆ng Kơnuk kơna, Khua dêh čar tañ pơsir hĭ hơdôm tơlơi gun găn mơ̆ng hơdôm boh tơring.

Pơtum glăi mông jơnum, Khua dêh čar ơi Phạm Minh Chính črâo rơđah boh than hơmâo ngă, phun tơhnal hơdôm tơlơi aka ƀu djơ̆, aka ƀu dưi ngă hăng tơlơi kiăng kơđiăng. Amăng hrơi blan pơ anăp, Khua dêh čar git gai djŏp gưl, anom bruă, hơdôm boh tơring khŏm prăp lui rơđah djŏp hơdră ngă bruă, pơsir hĭ tŭ yua hơdôm tơlơi aka ƀu klă, gir ngă hơđong tơlơi bơwih ƀong, pơgăn bruă pơđĭ nua gơnam ča čot, pơtrut đĭ kyar, pơhlôm tơlơi hơdip mơnuih ƀôn sang; djă bong hơđong kơđi čar - mơnuih mơnam, hơđong rơnuk rơnua plơi pla...