Ơi Nguyễn Phú Trọng Khua git gai ping gah dêh čar ta lăi pơthâo jơlan hơdră pơtom hiăp mơ̆ng Việt Nam rơngai, mơai pô, kiăng rơnuk rơnua, giăng mah, gơyut gơyâo mơak klă, ngă hrŏm hăng pơđĭ kyar; kăio tui lu bơnah, lu hơdră pơtom hiăp. Khua git gai ping gah ơi Nguyễn Phú Trọng hăng Khua mir sir ơi Joe Biden tŭ ư lĕ, djop bruă ƀuh rơđah, sa tơlơi yom hloh, kiăng pơtrut ngă giăng mah pŭ ƀăn Việt Nam-Mi jing bruă mă yôm mrô sa, pơpŭ hơdôm tơlơi dưi pơkă anăp bruă ngă pŭ ƀăn dĭ da gla kơñ mơ̆ng dua bơnah. Khua git gai ping gah dêh čar ta lăi, tơlơi thâo hluh nao rai dua bơnah, thâo hluh bruă ngă, pơpŭ boh tŭ yua, anŏ kiăng lăp djơ̆ mơ̆ng tơdruă hăng ƀu tek nao bruă amăng lăm dêh čar tơdruă ôh.

Khua git gai ping gah lăng yôm biă mă tơlơi pôr hrŏm mơ̆ng dua bơnah khua apăn akŏ dêh čar lăi pơthâo tơlơi pôr hrŏm pơđĭ tui tơlơi ngă giăng mah Việt Nam-Mi jing dua bơnah ngă hrŏm yôm pơphăn, hlom bom yua kiăng rơnuk rơnua, pơđĭ kyar hơđong kjăp. Tui hăng anun, Khua git gai ping gah ơi Nguyễn Phú Trọng lăi pơtong, hơdôm tơring čar pơprong pơtrut ngă hrŏm giăng mah Việt Nam-Mi. Amăng anun hơmâo bruă pơtrut ngă bruă kiăng dua bơnah thâo hluh nao rai tơdruă, ngă tui djop mơta tơlơi pơkă anăp či ngă bruă, hơđong sui thun; bưp nao rai, ngă hrŏm mơ̆ng khua mua pơprong, khua mua djop gơnong bruă, djop gưl, laih anun jĕ giăm mơnuih ƀôn sang dua bơnah.