Dua bơnah hok mơ-ak hăng hơdôm tơlơi yak nao hiam klă amăng tơlơi rô nao rai gru grua hăng ngă hrŏm yôm phăn djop mơta Việt Nam-Nga amăng hrơi blan rơgao. Khua git gai pơ ala mơnuih ƀôn sang dêh čar ơi Trần Thanh Mẫn rơkâo Đuma dêh čar Nga tŏ tui gum hrŏm kjăp hăng Ƀirô Khua pơ ala mơnuih ƀôn sang dêh čar Việt Nam, pơlăi nao rai tơlơi găn rơgao pơjing “Ƀirô Khua pơ ala mơnuih ƀôn sang dêh čar rơgơi”, djru pơgiong phiah phiăn hăng pơsir hĭ tơlơi gun brơi hơdôm akŏ bruă ngă hrŏm.

Dua bơnah tŭ ư pơtrut ngă hrŏm bơwih ƀong huă, sĭ mơdrô, tuh pơ alin, apui lơtrik, boh thâo ia rơgơi, pơtô pơjuăt, gru grua hăng pơbưp nao rai mơnuih ƀôn sang. Ơi Volodin pơsit tong Đuma dêh čar Nga amra pok prong hơdôm hơdră ngă hrŏm phrâo, djru pơtô hơdôm bruă gah dêh čar Nga hơmâo tơlơi dưi prong, laih dong pơsur pơtô tơlơi yuăn ƀơi Nga hăng tơlơi Nga ƀơi Việt Nam, pơgôp hơkrŭ kjăp tơlơi ngă hrŏm djop mơta.