Lơ 16/5, ƀơi Anih mă bruă Khua mir sir, Khua dêh čar ta ơi Phạm Minh Chính hmâo git gai ngă Lơphet čơkă sit nik Khua dêh čar Thái Lan yă Peatongtarn Shinawatra. Tơdơi kơ čơkă, 2 gơñu git gai Tal jơnum lok 4, gong gai hrŏm Việt Nam – Thái Lan. Amăng tal jơnum, dua Khua dêh čar tŭ ư hrŏm tơhnal rô nao rai kơplah wah Thái Lan – Việt Nam truh rơnoh khom ngă pơhlôm akô̆ tlôn.

Lăng glăi tơlơi rô nao rai 2 bôh dêh čar tơdơi kơ 10 thun akô̆ pơjing bruă gum hrŏm khom ngă, Khua dêh čar ta brơi thâo, 2 bôh dêh čar hmâo hơdôm tơlơi bơngač rơđah: Anun lĕ tơlơi đăo kơnang bruă kơđi čar khom ngă ƀu pơdơi pơđĭ dlông, bơkơtuai nao rai grŭp dưi pơtrut kơtang amăng abih bang hơdôm bruă, hơdôm gưl. Gum hrŏm pơgang rơnuk rơnua plơi pla lŏn ia jai hrơi jai nao dơlăm jing phun than yôm phăn mơ̆ng 2 bôh dêh čar. Gum hrŏm bơwih ƀong, sĭ mơdrô, tuh pơplai pơđĭ kyar tañ wot anô̆ kơjăp ñu. Mơ̆ng thun 2016 truh ră anai Thái Lan jing bơnah sĭ mơdrô nao rai gơnam tam prong hloh mơ̆ng Việt Nam hăng Việt Nam lĕ bơnah gum hrŏm dŏng tal 2 mơ̆ng Thái Lan amăng kual ASEAN, hăng prăk pơhrui glăi mơ̆ng gơnam sĭ mơdrô nao rai dua bơnah thun 2024 hmâo rơbêh kơ 20 klai dolar Mi hăng anăp nao 25 klai dolar Mi amăng hơdôm thun pơ̆ anăp anai. Tơdơi kơ tal jơnum lok 4, gong gai hrŏm Việt Nam – Thái Lan, Khua dêh čar ơi Phạm Minh Chính hăng Khua dêh čar yă Peatongtarn Shinawatra hmâo lăng ƀuh mông ngă Lơphet brơi nao rai hră pơ-ar gum hrŏm kơplah wah hơdôm Ding jum, gơnong bruă dua bôh dêh čar./.