Pơhiăp amăng mông ngă lơphet, Ding kơna Grŭp mă bruă Ping gah dêh čar ta, Khua phun akha Gong phun jua pơhiăp dêh čar Việt Nam Đỗ Tiến Sỹ lăi rơđah, amăng črăn jơlan 30 thun rơgao, khul mơnuih apăn bruă, mơnuih mă bruă mơ̆ng Grŭp wai lăng bruă djuai ania hmâo lu gum hơgôp yôm phăn amăng truh kih hrŏm mơ̆ng gru grua rơbêh kơ 78 thun Jua pơhiăp Việt Nam hăng đĭ tui nua yôm, pran kơtang pôr pơhing mơ̆ng sa Ƀirô čih tơlơi pơhing, pôr pơhing phun, lu mơta pôr pơhing truh hăng lu mơnuih lăng hmư̆ amăng lŏn ia ta hăng dêh čar tač rơngiao.

Amăng rơwang phrâo, khom kơtưn hơkrŭ đĭ kơjăp pran jua gum hrŏm hơbit abih bang djuai ania, ngă tui pran kơtang, kơjăp pran hloh dong bruă mă, tơlơi gum hơgôp mơ̆ng djop gưl mơnuih ƀôn sang, rŭ tơgŭ hăng ngă tui djop ngăn rơnoh, tơhnal gal, pran pơčeh phrâo mơ̆ng rim mơnuih Việt Nam, rŭ tơgŭ pran hrưn đĭ pran čang rơmang pơđĭ kyar mơ̆ng abih bang djuai ania. Ƀrô djơ̆ tal anai, Grŭp wai lăng bruă djuai ania dưi hmâo Gong phun jua pơhiăp dêh čar Việt Nam, hơdôm Ding jum, Gơnong bruă dêh čar, tơring čar, ƀôn prong ƀơk Hră bơni djă pioh tơlơi gum hơgôp klă, ba glăi bôh tơhnal mơ̆ng mơnuih apăn bruă, mơnuih mă bruă, čih tơlơi pơhing, dăp hơdră ƀrô djơ̆ tal hơdor glăi 30 thun hrơi pơdŏng./.