Mơguah lơ 13/5, ƀơi mông jơnum pơđut Jơnum ruah khua jơnum min djŏp djuai ania mơnuih mơnam Việt Nam tal XI, rơwang thun 2026-2031, pơ ala kơ Khul khua Jơnum min djŏp djuai ania mơnuih mơnam Việt Nam, yă Hà Thị Nga, Kơ-iăng khua - Khua čih pioh Jơnum min djŏp djuai ania mơnuih mơnam Việt Nam tal XI hơmâo lăi pơthâo glăi boh than Jơnum lok sa Jơnum min djŏp djuai ania mơnuih mơnam Việt Nam tal XI, rơwang thun 2026-2031. Ding kơna Ping gah, Khua ping gah Jơnum min djŏp djuai ania mơnuih mơnam, hơdôm khul grup mơ̆ng Gơnong dlông, Khua jơnum min djŏp djuai ania mơnuih mơnam Việt Nam tal X yă Bùi Thị Minh Hoài, hơmâo khua mua ruah glăi dong mơn, ngă Khua jơnum min djŏp djuai ania mơnuih mơnam Việt Nam tal XI, rơwang thun 2026-2031.

Pơhiăp lơ̆m gơgrong ngă khua, Khua jơnum min djŏp djuai ania mơnuih mơnam Việt Nam tal XI yă Bùi Thị Minh Hoài ƀuăn kjăp tơlơi pơmin kơđi čar, abih pran jua ngă bruă, pơtrut tơlơi dưi ngă pô mơ̆ng mơnuih ƀôn sang, tơlơi rơgơi, gơgrong bruă kơtang hloh, gir kơtir ngă bruă, ngă giong djŏp bruă hơmâo jao. Hrŏm hăng anun, bong kjăp tơlơi gum pơgôp, pơlir hơbit; ngă bruă hur har, hơdeč hmar, thâo pơčeh rơgơi, pơplih phrâo, pơƀut pok pơhai abih bang ha amăng plĕ djŏp bruă mă, hơdră či ngă bruă đah mơ̆ng dưi ngă truh kih Tơlơi pơtrun mông jơnum ba tơbiă, gum ngă kjăp tui khul gum pơgôp djŏp djuai ania, pơsit rơđah tơlơi gơgrong, kơdrưh mơ̆ng Jơnum min djŏp djuai ania mơnuih mơnam Việt Nam amăng rơnuk phrâo./.