VOV4.Jarai - Tui mrô jŭ yap mơng Anom bruă wai pơgang klin kman tơring čar Daklak brơi ƀuh, mơng akŏ thun truh ră anai, đơ đam tơring čar hơmâo 341 čô mơnuih ƀă tơlơi ruă ƀam ƀong tơkai, tơngan hăng mơbah, đĭ giăm 3,5 wŏt pơhmu hăng thun 2020, amăng anun hơmâo sa čô mơnuih djai. Mrô mơnuih ƀă tơlơi ruă ƀuh raih daih ƀơi 15 boh tơring glông, plơi prong hăng ƀuh lu tui amăng hơdôm hrơi tơjuh giăm anai hăng rĭm wŏt hrơi tơjuh hơmâo giăm 40 čô mơnuih ruă.

Anom bruă wai pơgang klin kman tơring čar brơi thâo, kiăng kơđiăng amăng bruă pơgang tơlơi ruă ƀam ƀong tơkaih tơngan hăng mơbah khŏm ngă tui tơlơi anai: rao tơngan na nao amăng ha hrơi hăng ia kơƀô tơlŏ, biă mă ñu hlâo kơ mông tơnă hơbai, hlâo kơ brơi čem brơi cơđai, hlâo kơ pi čơđai anet, tơdơi kơ nao juă glai. Laih dong kiăng mơñum ƀong hơdjă, sut rơgoh rang sang, kơƀang grê, hơdôm gơnam čơđai juăt ngui, gơnam hrăm hră, anih păn pok krư̆ bah amăng, tơkai rơñian kiăng kơ sut uă hăng ia jrao pơdjai kman.

Siu Đoan: Pơblang