VOV4.Jarai - Truh ră anai ăt dŏ 7 klăk 600 rơbâo ară vaccine Covid-19 hơmâo tlâ̆o brơi ling tơhan hăng mơnuih ƀon sang aka ƀu čih pơmut amăng plang pơhing bruă anai bơbeč nao bruă ngă brơi hră pơ-ar tlâ̆o vaccine hăng bruă pơplih mă yua boh thâo phrâo amăng dêh čar. Anai lĕ tơlơi pơhing hơmâo lăi nao amăng Jơnum lăng nao rai mơng ataih đơ đam dêh čar kiăng kơ ngă klă amăng plang čih pioh bruă tlâ̆o vaccine pơgang klin Covid-19 yua ding jum ia jrao gum hrŏm hăng Ding jum kông ang pơphun mơguah lơ 26/4, ƀơi Hà Nội. Ba truh tơlơi anai lĕ yua hơdôm anih pơphun tlâ̆o vaccine aka ƀu čih pơmut djop mrô vaccine ƀing gơñu tlâ̆o amăng plang čih pioh hrŏm. Hơdôm tơlơi pơhing kơ bruă tlâ̆o vaccine aka ƀu djơ̆ hrŏm hăng anih djă pioh tơlơi pơhing kơ mơnuih mơnam. Ding jum kông ang lăi rơđah, plang čih pioh dêh čar kơ mơnuih mơnam lĕ anih čih pioh phun kiăng kơ pơmut hrŏm tơlơi pơhing bơdjơ̆ nao tlâ̆o vaccine Covid-19 kah hăng hơdôm tơlơi pơhing pơkŏn kơ mơnuih ƀon sang, anăp nao pơplih mă yua boh thâo phrâo. Ding jum ia jrao brơi thâo, pơ anăp anai amra lui hĭ pơhaih gah ia jrao amăng dêh čar yua ră anai ƀu kiăng kiăo tui ĕp mơnuih F0,F1 dong tah. Samơ̆, ăt kiăng pơhaih gah ia jrao hăng ƀing tuai mơng gah rơngai rai pơ Việt Nam.

Siu Đoan: Pơblang