Nao pơkă lăng tơlơi ruă ƀơi Sang ia jrao Phú Hòa, amai Lê Thị Bích Loan, plơi Phú Thạnh, să Phú Hòa 2, tơring čar Dak Lăk čih anăn amăng măi djru brơi, arăng juăt iâu kiosk ia jrao rơgơi, dưm ƀơi anih čơkă tuai mut nao. Kơnong kiăng mă mrô QR amăng hră pơhlom nua ia jrao ƀudah hră căn cước công dân, pơdưm amăng măi pơčrang, măi anun pơđok djŏp tơlơi pơhing, anăn păn, hnun jing ñu huăi glêh čih anăn amăng hră laih anun mă hlao mrô tơguan nao pơkă lăng tơlơi ruă amăng măi hlao. Amai Loan lăi, ngă amăng măi anai amuñ mơn, tha, čơđai thâo ngă soh yơh: “Kâo lăng măi anai ñu ngă pơamuñ brơi kơ mơnuih ruă, anăn hơmâo pơdah rơđah. Pô kâo thun hlăk ai mơn jing ƀu lăi ôh, bơ ƀing neh met hai ăt thâo mơn mă yua. Hơmâo măi anai ta tut mă mrô tơguan tañ hloh, huăi tơguan sui ôh, huăi hŭi pơgao anăn, huăi hŭi pô nao hlâo mut nao tơdơi, pô tơdơi jing mut nao pơkă hlâo”.

Măi čih anăn nao pơkă tơlơi suaih pral phrâo ba yua ƀơi Sang ia jrao Phú Hòa mơ̆ng blan 9 anai mơn, rim wơ̆t tut anăn aka ƀu truh 1 mơnit lơi. Măi anai djru kiăng aset ƀiă mơnuih dŏ gak pơ anih čơkă, pơƀut ngă bruă pơkŏn dong.

Ơi Lương Văn Phước, Khua sang bruă ia jrao Phú Hòa brơi thâo, boh tŭ yua rơđah rơđông laih mơ̆ng rơnuč blan 7 truh kơ ră anai, sang ia jrao pok pơhai pơkă brơi tơlơi suaih pral kơ abih bang mơnuih, hăng rơbêh 3.500 wơ̆t čô hơmâo pơkă brơi: “Mơ̆ng hrơi hơmâo măi anai, jing bruă wai lăng mơnuih mă bruă mơak ƀiă kơ mơ̆ng hlâo, hlâo adih, khŏm kiăng hơmâo lu mơnuih čơkă, ră anai kiăng 1 truh kơ 2 čô đôč dưi ngă giong bruă laih. Anun jing ta jao ƀing juăt čơkă mơnuih ruă ngă bruă pơkŏn dong, djru brơi anih pơkă lăng tơlơi suaih pral kơ abih bang mơnuih glăk hơmâo ngă ƀơi lu anih. Kơnong kơ čơkă pơ anai đôč, arăng dưi nao hlao pơ anih pơkă tơlơi suaih pral, huăi dŏ dưm pơmut, tut măi mơ̆ng hơdôm anih pơjrao dong tah”.

Bruă pơđok tơlơi pơhing mơnuih ruă lơ̆m čơkă mơnuih nao pơkă tơlơi ruă, djru Sang ia jrao Phú Hòa huăi glêh dŏ čih pơmut hră pơ-ar laih anun jao bruă pơkŏn dong kơ mơnuih mă bruă. Anai jing tơlơi kiăng biă mă lơ̆m bă yua boh thâo mrô: măi mok djơ̆ lăp, mă yua amuñ, huăi rơngiă mông kơ ană plơi wơ̆t hăng ƀing mă bruă pơ sang ia jrao.

Yă Huỳnh Thị Son, Khua ping gah să Phú Hòa 1, tơring čar Dak Lăk lăi, hrŏm hăng prăk kăk brơi nao, hrơi blan rơgao, să hơmâo lu mơn prăk djru mơ̆ng abih bang mơnuih tơpuôl. Măi tut anăn pơkă tơlơi suaih pral ƀơi Sang ia jrao Phú Hòa yua Agribank pơdong ƀơi Phú Yên djru ba, jing sa amăng hơdôm mrô anun: “Hrơi blan rơgao, să Phú Hòa 1 hơmâo lu tơlơi gum djru mơ̆ng hơdôm boh kông ti, sang bruă mơdrô ƀơi să, biă ñu amăng bruă ba yua boh thâo mrô. Anai ăt jing tơlơi djru kiăng biă, đah mơ̆ng hơmâo lu gơam yua či ngă bruă kơ să Phú Hòa 1 amăng bruă ba yua boh thâo mrô ƀơi abih bang bruă mă”.

Tui hăng Gơnong bruă ia jrao Dak Lăk, ba yua boh thâo mrô glăk hơmâo ngă mơ̆ng hră čih pioh mơnuih ruă, hră tơlơi suaih pral điện tử truh kơ tla prăk ƀu kiăng prăk mơta, hăng lu tơlơi gêh găl pơkă, pơjrao tơlơi ruă. Rơwang thun 2026-2030, Dak Lăk brơi nao giăm 484 klai prăk kơ 7 kơčăo bruă ia jao mrô. Hrŏm hăng prăk mơ̆ng Kơnuk kơna, tơring čar ăt pơsur iâu pơthưr abih bang mơnuih gum pơgôp, djru ba, đah mơ̆ng ngă bruă klă tui, hơmâo djŏp gơnam yua či kiăng.

Tơdơi kơ pơmut hrŏm, tơring čar Dak Lăk hơmâo 36 anih pơkă, pơjrao tơlơi ruă, hơmâo sưng đih, amăng anun 14 boh sang ia jrao prong gưl tơring čar, 22 boh sang ia jrao gưl tơring glông, jing ră anai lĕ gưl să. Kiosk ia jrao rơgơi glăk hơmâo dưm ƀơi 15 anih mă bruă. Amăng anun, sang bruă Agribank pơdong ƀơi Phú Yên djru măi mok ƀơi Sang ia jrao Phú Hòa hăng Sang ia jrao Sơn Hòa. Ơi Phan Thông Thái, Khua Agribank Phú Yên brơi thâo, sang bruă ăt prăp či djru măi mok gah ia jrao hăng djru pơkra brơi hră pơ-ar ƀơi hơdôm boh să, phường dong: “Ƀing gơmơi glăk hơmâo jơlan hơdră djru dong mơn Kiosk ia jrao rơgơi hăng hơdôm Kiosk kơ gong gai să, phường dong, djru brơi măi mok, kiăng ană plơi dưi tŭ mă hơdôm tơlơi klă mơ̆ng bruă ba yua ia rơgơi mrô”.

Tơlơi djru mơ̆ng abih bang mơnuih huăi plih hĭ ôh bruă tuh pơ alin mơ̆ng Kơnuk kơna, samơ̆ dưi pơhrua amăng hơdôm tơlơi kiăng mơ̆ng plơi pla. Hăng măi mok, mơnuih mă bruă rơgơi tui hăng tơlơi kiăng, anŏ klă mơ̆ng boh thâo mrô dưi ƀuh amăng bruă rơđah rơđông. Kah hăng ƀơi sang ia jrao pơ Dak Lăk, anŏ klă ñu ƀuh mơ̆ng măi mok hơmâo ba yua, djru mơnuih ƀôn sang huăi glêh čih hră, huăi rơngiă mông dŏ tơguan./.