Truh plah wah blan 9/2026 anai, anom bruă ia jrao Lâm Đồng čih pioh hơmâo truh 4.200 čô mơnuih ƀă tơlơi ruă ƀam ƀong plă tơkai tơngan hăng čơƀek, amăng anun 2 čô  laih djai amăng kual Đức Trọng. Duăm đung drah ăt hơmâo čih pioh hơmâo rơbêh 4.500 čô mơnuih duăm hăng 1 čô laih djai. Amăng 1 wơ̆t hrơi tơjuh laih rơgao, anom bruă ia jrao Lâm Đồng hơmâo ƀuh dơ̆ng 5 bit anih hơmâo klin ƀam ƀong plă tơkai tơngan hăng čơƀek (amăng bah), pơ alin abih anih hơmâo kman mơ̆ng akŏ thun truh ră anai lĕ 75 anih. Djop anih hơmâo klin anun ƀuh amăng plơi pla hăng ƀơi sang hră. Pơkă hăng tal anai, thun hlâo lĕ mrô ƀă kman ƀam ƀong plă tơkai tơngan hăng amăng bah ƀơi Lâm Đồng lu biă mă rơbêh 2.040 čô mơnuih ƀă, duăm đung drah đĭ tui 240 čô.

Phun ñu hơmâo pơsit lĕ, klin hơđuh rai kơtang ƀam ƀong plă tơkai tơngan hăng duăm đung drah ƀơi Lâm Đồng lu đơi, yua ayuh hyiăng adai hơjan, djrưh ia lu, anŏ gêh găl kman keč čeh čar lar lu tui. Blan 9 yơh hrơi blan keč boh lu laih anun kman ƀam ƀong plă tơkai tơngan bơi čơđai sang hră gưl muai hăng gưl sa lu mơ̆n.

Gơnong bruă ia jrao Lâm Đồng ră anai ăt pok pơhai lu jơlan hơdră pioh pơgăn klin ƀă hyu; pơđĭ tui tơlơi thâo mă bruă kơ khul khua mua, nai ia jrao, ƀing nai pơtô; pơphun ngă bruă rơnăk anih dŏ, pơdjai kman keč, ană keč amăng ia plăng, ia dơ̆ng jum dar anih dŏ; pơkă lăng hăng pơjrao brơi mơnuih ƀôn sang amăng kual hơmâo klin djơ̆ hơdră hăng hmao kru, biă mă ñu anih hơmâo klin duăm đung drah, anăm lui pơjrao kaih ôh.

Gơnong bruă ia jrao Lâm Đồng ăt jao kơ sang bruă wai lăng kman duăm ruă amăng tơring čar pok pơhai tañ, ĕp lăng djuai kman duăm ruă ngă ƀă kơtang tơlơi ruă ƀam ƀong kơčung plă tơkai tơngan hăng čơƀek laih anun kman duăm đung drah pioh pơtong rơđah tong ten, hŭi ƀă hyu kơtang lho, khom dăp hơdră, ĕp bruă pơgăn hmao kru hăng khut khăt mơtam.