Mơ̆ng thun 2022 truh ră anai, đơ đam dêh čar ta hơmâo čih pioh 90.000 čô mơnuih asâo, eo kĕ ƀudah kuač djơ̆, amăng anun hơmâo 365 čô hơmâo kman djơ̆ tuai, ruă laih anun djai. Prăk tuh pơ alin kơ bruă pơhlom pơgang hăng pơjrao tơlơi asâo, eo kĕ ƀudah kuač truh kơ 1000 klai prăk mơtam. Kơnong ƀơi Dak Lak, amăng thun blan anai hơmâo hơdôm rơtuh čô mơnuih asâo, eo kĕ, kuač, amăng anun 7 čô laih mơnuih djai.

Ƀơi mông jơnum, ƀing khua mua apăn bruă lăi tơpă, tơlơi tơnap tap amăng bruă wai lăng khul asâo, eo rông, tlâ̆o jrao vaccine hăng krăp lăng, pơsir asâo, eo djơ̆ tuai, wơ̆t mơnuih djơ̆ tuai aka ƀu hơmâo ia jrao pơjrao dưi hơdip ôh. Lu tơlơi pơgôp hiăp amăng mông jơnum lăi rơđah, bruă mă pơhlom, pơgang kman djơ̆ tuai aka đing nao djơ̆ lăp ôh; bruă wai lăng pŭ asâo, eo, mơnong rông dŏ ngă tŭ kơ hơmâo.

Mơ̆ng thun 2026-2030, ƀing khua mua hơmâo tŭ ư hrŏm, kiăng kơtưn hyu pơtô lăi, pơđĭ tui tơlơi thâo hluh kơ mơnuih ƀôn sang, biă mă ñu pơsir lăp djơ̆ sit hơmâo mơnuih asâo eo kĕ ƀudah kuač djơ̆, khom nao tañ pơ sang ia jrao hmư̆ pơtô brơi hơdră pơgang hăng pơjrao, tlâ̆o jrao vaccine hmao kru. Bruă pơhlom, pơgang kman djơ̆ tuai kiăng pok pơhai pơtô pơblang re se, ngă tui na nao, hơmâo tơlơi gum hrŏm mơ̆ng anom bruă ia jrao, anom bruă pơjrao hlô mơnong rông hăng khul mơnuih mơnam amăng plơi pla, anăp nao kiăng ƀu hơmâo mơnuih djai yua kơ kman djơ̆ tuai ôh amăng thun 2030. Ơi Võ Hải Sơn, Kơ-iăng khua anom bruă pơhlom tơlơi duăm ruă (Ding jum ia jrao), pơhŭi hlâo:

“Ƀing gơmơi pơtă pơtăn abih bang mơnuih ƀôn sang lĕ, tơdah hlơi thâo, ƀu tơphă ôh, asâo, eo kĕ hăng kuač djơ̆ lĕ, khom nao pơ sang ia jrao mơtam pioh pơkă lăng, tlâ̆o ia jrao huyết thanh pơhlom kman ruă. Hăng hơdôm sang anŏ hơmâo rông asâo, eo, kiăng tlâ̆o pơgang abih, asâo, eo ta rông. Hăng khua mua anom bruă kơnuk kơna, gong gai plơi pla, kiăng kơtưn ngă bruă krăp lăng, pơtô lăi brơi tlâ̆o jrao vaccine khom djop kơ pŭ asâo, eo amăng mơnuih ƀôn sang hlăk rông; laih dơ̆ng ăt khom pơhlom djop ia jrao vaccine, huyết thanh pioh tlâ̆o pơgang kơ mơnuih eo, asâo kĕ ƀudah kuač, anăm lui hơmâo kman ruă djơ̆ tuai ƀă”.

Dak Lak ăt pơphun mông jơnum pơtum hăng pơhrăm lu sang bruă, anom bruă kơ bruă pơhlom, pơgang kman djơ̆ tuai gưl dêh čar thun 2026. Jơlan hơdră anai hơmâo rơbêh 1000 čô mơnuih nao pơhmư̆ ƀuh ƀô̆ mơta, gum hrŏm rŭi hyu ƀơi jơlan, pơtô pơblang hăng ngă tui bruă krăp lăng, tlâ̆o pơgang vaccine kơ asâo, eo hăng pơsir anih hơmâo klin.

Tơlơi lăp đing nao kman duăm ruă djơ̆ tuai lĕ, sit ƀă kman djơ̆ tuai aka ƀu hơmâo ia jrao dưi pơjrao ôh, ƀing hlơi ƀă laih lêng kơ djai soh, samơ̆ tơlơi ruă anai dưi pơhlom pơgang hlâo, tơdah hlơi hơmâo tơlơi truh asâo eo kĕ, khom rao rơgoh nam rơkao djơ̆ lăp hăng khom tlâ̆o ia jrao vaccine pơhlom pơgang hmao kru. Khă hnun, bruă wai lăng khul asâo, eo hăng tlâ̆o pơgang asâo, eo ăt sa bruă mă lăp đing nao tong ten hloh, ƀơi Dak Lak mơ̆ng anai pơ klôn dŏ sư̆ rơbư̆ đôč tơlơi anai. Truh blan 7 thun anai, mrô tlâ̆o vaccine pơgang kman djơ̆ tuai eo asâo kiah ngă rơbêh 28,3% đôč, ƀiă hloh rơnoh či kiăng pơgang amăng plơi pla. Lơ̆m anun kman virus djơ̆ tuai ăt ƀă hyu amăng lu anih hăng ƀă ƀơi lu asâo eo samơ̆ aka ƀu ƀuh abih ôh.

Bruă pơhlom, pơgang kman djơ̆ tuai yom biă mă, yua kơ anun kiăng pơphun mơ̆ng bruă mă anet tum teč hloh; rim sang anŏ wai lăng mă khul asâo, eo brơi klă khom tlâ̆o vaccine pơgang djop; ƀu phai lui asâo eo đuăi hyu prah prang ôh; sit asâo, eo kĕ ƀudah kuač khom rao rơgoh nam rơka rơgoh hăng ia jrao laih anun nao pơ sang ia jrao khom tlâ̆o pơgang djop. Lơ̆m rim čô mơnuih prăp lui hlâo sa yak, gong gai plơi pla prăp lui sa yak hăng djop anom bruă ngă hrŏm tong ten, tơhnal pơkă ƀu hơmâo mơnuih djai yua kman djơ̆ tuai amăng thun 2030 sit nik amra nao giăm yơh tơlơi či ngă tui djơ̆ lăp.