Tui lăi pơthâo mơng anom bruă wai pơgang tơlơi duam ruă tơring čar Dak Lak (CDC Dak Lak), truh ră anai, đơ đam tơring čar hơmâo 8.433 čô mơnuih duam đung drah, đĭ 25% pơhmu tui tơđar thun hlâo. Kơnong hơdôm hrơi giăm anai, rĭm hrơi hơmâo rơbêh 100 čô mơnuih duam. Hơmâo laih 2 čô djai ƀơi phương Tân An hăng să Quảng Phú. Hơdôm ƀon lan amuñ hơmâo mơnuih duam hloh hăng lu mơnuih duam anun lĕ phương Buôn Ma Thuột, Tân Lập, Tân An, Ea Kao hăng hơdôm boh să Ea H’leo, Hòa Phú, Tân Tiến, Krông Pač, Ea Tul, Čư̆ M’gar. Phương Thành Nhất hăng hơdôm boh să Ea Knuêč, Pơng Đrang, Ea Đrông, Ea Na, Ea Drăng dong amăng grup amuñ ƀuh kman duam đung drah.

Mrô mơnuih duam đĭ lu tui amăng hơdôm hrơi giăm anai lĕ yua hơjan sui hrơi, ngă gêh gal brơi keč čeh čar hăng ngă lar hyu kman. Lơm anun, bruă pơgang ƀơi sa dua bit anih aka ƀu klă, mơnuih ƀôn sang dŏ pơtah hơtai.

Ơi ia jrao Hoàng Hải Phúc, Khua CDC Dak Lak brơi thâo, mrô mơnuih duam lu tui ngă Anom pơjrao ječ čơđai muai, sang ia jrao prong kual Dap kơdư lêng kơ kơniă; lu sang ia jrao kơnuk kơna pơdong hăng mơnuih ƀôn sang pơdong ƀơi kual Yŭ tơring čar Dak Lak ăt bưp tơnap tap tui anun mơn. CDC Dak Lak glăk ječ ameč pok pơhai hơdôm hơdră pơgang kiăng plai ƀiă ƀuh mơnuih duam phrâo, wai pơgang anih hơđuh kman, anăm brơi lar hyu lu anih. “Anom bruă pơgang tơlơi duam ruă tơring čar Dak Lak pơphô bruă brơi gơnong bruă ia jrao, Jơnum min mơnuih ƀon sang tơring čar Dak Lak hơmâo hră pơtrun git gai Jơnum min mơnuih ƀon sang hơdôm boh să, phương kiăng pơtrut kơtang bruă pơhlôm pơgang hăng bruă pok pơhai hơdôm tal hyu rơmet pơagaih jum dar; hăng mơnuih ƀôn sang kiăng pơgang drơi jăn pô. Kơnong hăng gơnong bruă ia jrao, ƀing gơmơi pơkiăo nao ƀing apăn bruă nao tơl hơdôm kual hơmâo kman kiăng ĕp lăng mrô vec-tơ, mrô pơkă lăng keč moaih kiăng ba nao gơnam măi mok, pruih ia jrao đuăi hăng rơdêh ôtô kiăng pơdjai keč, arŏng aroač jum dar.”

Tui anom bruă wai pơgang tơlơi duam ruă, mơng akŏ thun truh ră anai, đơ đam tơring čar hơmâo rơbêh 7.600 čô mơnuih duam đung drah hăng 1 coco mơnuih djai. Pơhmu tui tơđar thun 2025, mrô mơnuih duam đung drah đĭ 5.059 čô. Đơ đam tơring čar hơmâo 393 anih hơmâo kman, đĭ 28 anih pơhmu tui tơđar thun 2025. Gơnong bruă ia jrao pơhŭi hlâo bruă pơhlôm pơgang duam đung drah lĕ bruă jao kiăng ngă tui na nao, sit biă ñu amăng bơyan hơjan hlim, ayuh hyiăng ngă gêh gal brơi keč čeh čar. Tơlơi gum hrŏm kjăp kơplah wah gơnong bruă ia jrao, gong gai ƀon lan hăng mơnuih ƀôn sang, sit biă ñu lĕ bruă pơsir hĭ khut khăt hơdôm gơnam pơkŏng ia ƀơi hơdôm boh sang anŏ amra dưi pơgang vec tơ ngă lar hyu kman, plai ƀiă ƀuh ƀă tơlơi ruă hăng huăi ngă lar hyu, mơng anun wai pơgang brơi tơlơi suaih pral mơnuih mơnam./.