VOV4.Jarai - Tơring čar Lâm Đồng glăk hơmâo klin duam đung drah hơđuh kơtang lơ̆m mrô mơnuih ruă rơbêh kơ 2000 čô. Truh mông anai, tơring čar Lâm Đồng hơmâo 2.000 čô laih duam đung drah, đĭ rơbêh 1.500 čô pơhmu hăng tơđar thun hlâo. Lơ̆m anun, tơring čar anai glăk truh bơyan hơjan anun jing amuñ hơmâo duam đung drah hloh. Ơi Trịnh Văn Quyết, Kơ-iăng khua Gơnong bruă ia jrao tơring čar Lâm Đồng brơi thâo, hrŏm hăng bruă pơtô pơblang kiăng ană plơi ngă klă hơdră pơgang klin, anom bruă ia jrao ăt hơmâo lu hơdră pơgang hăng pơjrao mơn.

Lâm Đồng glăk pơđĭ tui bruă pơgang hăng pơjrao duam đung drah

Abih bang anom bruă ia jrao lêng hơmâo hơdră ngă bruă rơđah rơđông hăng prăp lui hlâo gơnam yua ia jrao đah mơng dưi pơjrao brơi mơnuih ruă. Laih dong pok pơhai hơdră ngă bruă lơ̆m ƀuh anih hơmâo klin phrâo, pơgăn hĭ hmao tlôn mơtăm.

Siu H’Mai: Pơblang