VOV4.Jarai - Lăng glăi hơdôm tơlơi dưi prong tơdơi thun blan pơklaih rơngiao lŏn ia, biă mă ñu lĕ giăm 3 thun pơgang klin Covid-19, hơdôm tơlơi dưi yôm phăn lơ̆m ngă tui hơdră bruă djuai ania amăng tơring čar Dak Lak ƀing ta kiăng kơ lăi nao kơ bruă hơkrŭ glăi kjă hăng man pơdong anih anom ia jrao ƀơi ƀon lan, djơ̆ hăng tơlơi kiăng lĕ anih blung hlâo khăm pơjrao brơi mơnuih duam ruă amăng plơi pla ala ƀon.

Rĭm wŏt dju djuam duam ruă, ơi Y Diệp Uông, dŏ ƀơi plơi Dơng Ƀắc, să Yang Tao, tơring glông Lắk, tơring čar Dak Lak nao yơh pơ sang ia jrao să khăm, mă jrao ba glăi mơñum. Ơi Y Diệp brơi thâo: Neh met wa amăng plơi pla hur har pran jua lơ̆m ƀuh sang ia jrao să hơmâo man pơdong prong rơhaih, ƀing nai ia jrao, ơi ia jrao khăm pơjrao brơi abih pran jua.

“Hlâo adih tơdah duam ruă ƀing gơmơi juăt ngă yang tui tơlơi phiăn ƀu klă hiam sô hơđăp. Ră anai ƀu tui anun dong tah, yua kơ hơmâo Kơnuk kơna lăi pơthâo hơmâo laih sang ia jrao yua anun tơdah duam ruă thơ amra nao khăm tơl sang ia jrao. Hlâo anun tơnap tap biă mă, ră anai hơmâo rơdêh thut đuăi nao rai, hơmâo sang ia jrao giăm anai dong yua anun gêh gal biă mă”.

Hơdôm măi mok gah ia jrao hơmâo blơi pioh bơwih brơi tơlơi suaih pral kơ mơnuih ƀon sang

Hăng lu neh met wa, Sang ia jrao să Yang Tao amăng hơdôm thun laih rơgao lĕ anih gơnang nao mơng mơnuih dju djuam duam ruă. Ơi ia jrao Nguyễn Văn Hà, Kơ-iăng Khua sang ia jrao să Yang Tao brơi thâo: Lu mơnuih amăng plơi pla đa rơka rơkač yua kơ mă bruă, đa duam ruă, laih dong ƀing đah kơmơi pin kian tơkeng mơmŏt mlăm, tơdah ƀu dưi nao tơl sang ia jrao amra hơmâo ƀing nai ia jrao gơgrong djru brơi rĭm boh plơi rai tơl sang kiăng kơ khăm hăng pơjrao brơi blung hlâo kơ mơnuih ƀon sang.

“Anai lĕ plơi pla dŏ hơdip kơ mơnuih djuai ania ƀiă hăng abih bang lêng kơ ngă hmua soh yua anun ƀu thâo phe pho ôh. Amăng hrơi blan giăm anai, neh met wa jai thâo hluh tui yơh. Sit biă ñu, amăng thun blan pơgang klin Covid-19 laih rơgao, mơnuih ƀon sang hơmâo ngă tui tơlơi pơkă 5k, ƀing gơñu pit đih akă sơker, rơmet pơagaih jum dar anih dŏ hơdip. Thâo man pơkra drông war kiăng kơ krư̆ hlô mơnong ataih mơng sang dŏ, thâo mă yua hơdôm sang juă glai. Ră anai tơdah dju djuam duam ruă ƀu ngă yang dong tah mơ̆ nao khăm pơ sang ia jrao adih. Sa thun ƀing gơmơi pơjrao brơi mơng 8.000 truh pơ 10.000 čô mơnuih amăng să”.

Rơbêh 27 thun ngă bruă gah ia jrao, ơi ia jrao Nông Văn Sáng, Khua sang ia jrao să Ea M’Droh, tơring glông Čư̆ Mgar ăt dŏ hơdor na nao hơdôm hrơi blung a ñu nao mă bruă ƀơi anai. Ơi ia jrao Sáng brơi thâo: Hlâo adih, tơlơi hơdip kơ mơnuih ƀon sang bưp lu tơlơi tơnap tap, lu phiăn juăt sô hơđăp ƀu hiam anun lĕ ƀu ba mơnuih duam ruă nao pơ sang ia jrao, tơkeng mă pơ sang, ƀu ngă tui hơdôm hơdră pơgang klin kheng. Truh ră anai, hăng pran gir run mơng gơnong bruă ia jrao, mơnuih ƀon sang kơđiăng laih amăng bruă pơgang tơlơi suaih pral, nao pơ sang ia jrao khăm tơdah duam ruă, hơdôm tơlơi phiăn ngă yang, pơjrao mă hăng hla kyâo pơtâo jai hrơi lui hĭ abih. 100% mrô đah kơmơi pi kian lêng kơ ba nao tơkeng pơ sang ia jrao, ƀu hơmâo hlơi ôh tơkeng mă pơ sang.

“Ră anai hơmâo măi siêu âm, măi pơkă lăng hơtai boh suă jua, hơdôm măi hrĭp ia adung, ia khăk, pơčrang lăng amăng drơi jăn. Lơ̆m bruă bơwih brơi tơlơi suaih pral amăng plơi pla hơmâo hrưn đĭ klă, mơnuih ƀon sang nao khăm, pơjrao pơ ataih amra ƀiă tui yua anun amra plai ƀiă hrŏ prăk kak đĭ rơdêh, huăi rơngiă hrơi mông, huăi ngă tơnap tap kơ pô sang kiăo tui wai lăng”.

Ơi ia jrao ƀơi Sang ia jrao prong kual Dap kơdư tơring glông Lak khăm pơjrao brơi mơnuih duam ruă

Tui hăng hăng jŭ yap mơng gơnong bruă ia jrao tơring čar Dak Lak, ră anai 100% mrô sang ia jrao amăng să hơmâo man pơdong, mrô să tui hơnong pơkă gưl dêh čar gah bruă ia jrao truh ră anai rơbêh kơ 99%. Ƀơi tơring glông Lak sa amăng hơdôm kual tơnap tap ƀơi Dak Lak, truh ră anai bruă bơwih brơi tơlơi suaih pral kơ rơbêh 74.000 čô mơnuih ba glăi boh tŭ yua prong prin. Ơi Phạm Phú Anh, Kơ-iăng Khua sang ia jrao tơring glông Lak brơi thâo: Truh ră anai, abih bang sang ia jrao să amăng tơring glông lêng kơ djơ̆ hơnong pơkă ia jrao să rơwang thun 2016-2020. Djop sang ia jrao lêng kơ pơphun khăm, pơjrao tui hrăm pơhlôm gah ia jrao, pơhlôm bruă ƀơk brơi jrao kơ mơnuih duam ruă. Hrŏm hăng anun, djop sang ia jrao lêng kơ ngă tui klă amăng pơjrao ječ mơnuih ruă kraih hăng nao nao sang ia jrao prong hmao tlôn hăng ƀing mơnuih ruă kơtang.

“Ƀô̆ mơta bruă ia jrao ƀơi ƀon lan hơmâo lu tơlơi pơplih phrâo. Pơhmutu hơdôm tơlơi ruă mơng klin kman lar hyu yua kơ hơmâo vaccine tlâ̆o pơgang tui ră anai ngă klin tơdŭ trun biă mă. Amăng bruă bơwih brơi tơlơi suaih pral kơ ƀing pi kian hăng brơi ƀing čơđai nge, tơlơi pơmĭn mơng ƀing đah kơmơi ƀơi anai pơplih biă mă. Pơhmutu kar hăng đưm hlâo adih lu đah kơmơi pi kian tơkeng pơ sang, ră anai lêng kơ ba nao pơ sang ia jrao.

Ƀơi tơring čar Dak Lak, anih anom ia jrao jai hrơi djơ̆ hăng tơlơi kiăng ječ pơjrao brơi ƀing ruă kraih, ƀing duam ruă. Djop sang ia jrao hơmâo pơgôp prong amăng bruă bơwih brơi tơlơi suaih pral, djru brơi mơnuih ƀon sang dưi tŭ mă hơdôm bruă bơwih brơi gah ia jrao klă ƀiă dong ƀơi ƀon lan, tơlơi ngă jê̆ giăm tui bruă bơwih brơi tơlơi suaih pral amăng djop kual.

Siu Đoan: Pơblang