Mơng sa anom bruă đơđet hăng gơnam măi mok dŏ kơƀah, truh ră anai anom bruă jing anom ia jrao pơgang hlâo amăng kual. Amăng 50 thun rơgao, anom bruă hơmâo pơgôp yôm phăn amăng hơdôm bruă ia jrao pơprong anun lĕ pơjrao hĭ tơlơi ruă djô găn, pơgang hĭ tơlơi ruă uốn ván ƀơi ƀing čơđai, pơgang hơdôm kman hŭi rơhyưt anun lĕ pơtah čroh, ruă djơ̆ hmơi, duam đung drah, ƀam ƀong tơkai, tơngan hăng mơbah.

Đĭ pơhiăp amăng mông ngă lơphet, kơ-iăng Khua ding jum ia jrao Nguyễn Thị Liên Hương tŭ yap hăng pơpŭ hơdôm tơlơi gir run, tơlơi gum pơgôp mơng ƀing nai ia jrao amăng anom bruă amăng 50 thun pơjing hăng prong kơtang. Laih dong rơkâo, anom bruă kiăng đing nao bruă pơgang tơlơi ruă, kơtưn lăi pơthâo, pơtô pơblang hơdôm hơdră pơgang tơlơi suaih pral amăng mơnuih ƀôn sang, pơgang tơlơi ruă huăi lar hyu, prap lui ngăn rơnoh kiăng pơgang klin kman hăng hơdôm bruă ia jrao mơnuih mơnam ječ.