Dŏ tơguan mă ia jrao tơdơi kơ arăng pơkă lăng drơi jăn, tơlơi suaih pral ñu, ơi Đoàn Thanh Phương, plơi Hội Phú, să Tuy An Đông brơi thâo.

“Bơni biă mă kơ djop sang bruă hơmâo djru tơlơi khăp pap, kơnuk kơna đing rai kơ ană plơi pla, lơ̆m ƀing gơmơi ia ling dăo ngă kơnong thâo dŏ apăn ƀơi yông tơda sang đôč, abih bang dram gơnam amăng sang ia puh pơđuăi pôt. Tơdơi kơ ia ling dăo prong tui anun, lu khul grup djru tơlơi khăp pap rai brơi gơnam tam, tơña bla laih anun kơnuk kơna, sang bruă kơnuk kơna djru rai pơkă lăng drơi jăn, pran jua, pơjrao duăm ruă, ƀơk pơpha ia jrao, gơmơi bơni biă mă”.

Dŏ djă kơdŭng ia jrao phrâo mă, yă Lê Thị Hương dŏ ƀơi phường Đông Hòa, tơring čar Dak Lak kah pơpha hăng pran jua ol kơdol mơak yua dưi hơmâo ƀing ơi ia jrao mơ̆ng ataih adih glăi pơjrao brơi tơlơi duăm ruă kơ mơnuih ƀôn sang.

 “Hmư̆ lăi hơmâo khul ơi ia jrao mơ̆ng ƀôn prong Hồ Chí Minh rai, pơkă lăng tơlơi suaih pral kơ mơnuih ƀôn sang, ƀing gơmơi mơak biă mă, ƀing ơi ia jrao pơkă lăng tong ten, pơtô ba mơnuih ƀôn sang djop tơlơi. Kâo bơni biă mă, hok mơak mơ̆n”.

Mơ̆ng lơ 23/11 truh kơ ră anai, hrŏm hăng ƀing nai ia jrao tơring čar Dak Lak, mơ-it nao 5 khul, tŭ jum hrŏm ƀing ơi ia jrao mơ̆ng Hà Nội, Hải Phòng, Đồng Nai, ƀôn prong Hồ Chí Minh…..brơi nao pơkă lăng tơlơi duăm ruă kơ mơnuih ƀôn sang ƀơi 11 boh să ia ling dăo kơtang hloh, hăng 22 bit anih hyu pơkă lăng tơlơi duăm ruă kơ mơnuih ƀôn sang tơl plơi pla sang anŏ. Kơnong tơring čar Đồng Nai hă, hơmâo mơ-it rai 3 khul ơi ia jrao djru ba.

Thạc sĩ, ơi ia jrao rơgơi hnơ̆ng II, Nguyễn Trọng Nghĩa, Kơ-iăng khua sang ia jrao prong pơjrao čơđai muai Nhi Đồng, tơring čar Đồng Nai brơi thâo, amăng 2 hrơi mă bruă ƀơi să Hòa Mỹ hăng Tuy An Đông, grup ơi ia jrao hơmâo pơkă lăng brơi 1.500 čô mơnuih ƀôn sang, amăng anun lu kơ čơđai duăm ruă, pơtŭk hơdrap, ƀlĕ ia mơdung, duăm pơ-iă hlor amăng drơi jăn, čơđai pơ-ai buai kơƀah mơnong ƀong huă; mơnuih prong lĕ hơmâo kman mơruih găi ƀơi klĭ kliăng, ruă drah nur, ruă hlung asơi laih anun rơka tơhlơ̆t rơnah yua tĕk djơ̆ hnă hơmâo mta lơ̆m ia ling dăo ngă.

  “Grup ƀing gơmơi prăp lui tong ten biă mă, gơmơi hơmâo khul ơi ia jrao wơ̆t hăng ơi ia jrao pơjrao ƀing čơđai, ơi ia jrao pơjrao mơnuih prong hai, ƀing ơi ia jrao pơjrao ječ ameč hăng sa boh rơdêh pơgiăng mơnuih ruă, sa boh rơdêh pơgiăng gơnam. Khul ơi ia jrao ƀing gơmơi hơmâo djop ia jrao djă ba. Amăng ia jrao hơmâo dua khul: sa lĕ khul djă ba 1 rơbâo kơdung ia jrao sang anŏ, pioh ƀơk brơi soh pơjrao ƀing duăm pơ-iă hlor, ia jrao lưh pơ-iă drơi, ia jrao ruă akŏ, ia jrao ruă kian pơtah čroh…Dua dơ̆ng lĕ ia jrao djă ba hră pơjrao tui ơi ia jrao čih brơi”.

Hrŏm hăng bruă pơkă lăng tơlơi duăm ruă, anom bruă ia jrao tơring čar Dak Lak dŏ đing nao djru rơnăk anih dŏ jum dar tơdơi kơ ia ling dăo. Lu khul tơhan, mơnuih mă bruă hmar, pơjrao tañ mơ̆ng gơnong bruă ia jrao ngă hrŏm tơhan kông an, ling tơhan hăng gong gai kơnuk kơna ăt hyu duñ djah, pơsir hlô mơnong djai, rơnăk anih dŏ hăng hơdră pruih ia jrao pơdjai kman, pơrơgoh ia mơñum. Ƀơi anih ia ling dăo hrŏ laih, ia jrao pruih pơdjai mač kman pruih pơgang djop anih hŭi hơmâo klin kheng. Ia bơmun, ia tơnang, gơnam yua pơdong ia djă ba Cloramin B dưm ngă jơngeh ia; bruă mă krăp lăng hŭi  hơmâo kman ƀă hyu kah hăng duăm đung drah, ruă kian pơtah čroh, kman ngă kơčung ƀek, plă tơkai, tơngan ăt đing nao pơhlom hlâo. Ơi ia jrao Châu Trọng Phát, Kơ-iăng khua anom bruă ĕp kman duăm ruă tơring čar Dak Lak brơi thâo:

“Rĭm hrơi, ƀing gơmơi akŏ pơjing mơ̆ng 5-10 grup, pok pơhai brơi nao tơl plơi pla. Hrŏm hăng bruă hyu pơtô lăi kơ mơnuih ƀôn sang amăng plơi ngă pơrơgoh anih hơdip jum dar, pơhlom kman duăm ruă, ƀing gơmơi hyu sem lăng tơdah či hơbơi hơmâo klin mơnuih duăm ruă, pơjrao pơđut mơtam anăm brơi klin lar hyu. Pơtô mơnuih ƀôn sang hơdră pơsir hĭ ia yua kiăng hơdjă rơgoh kah hăng hyu pơtô rơnăk mơnong ƀong huă brơi mơnuih ƀôn sang amăng plơi pla”.

 Yua hơmâo tơlơi gum hrŏm hmar mơ̆ng Gơnong bruă ia jrao laih anun gong gai kơnuk kơna kual plơi pla, hơdôm grup ơi ia jrao mơ̆ng djop tơring čar, truh ră anai yap hơmâo 5000 wơ̆t mơnuih ƀôn sang ƀơi să kual ia ling dăo dưi pơkă lăng tơlơi suaih pral hăng ƀơk ia jrao pơjrao. Abih bang grup ơi ia jrao hyu pơjrao brơi mơnuih ƀôn sng hơmâo pơtô ba, pơčrâo brơi hơdră wai lăng răk rem tơlơi suaih pral ƀơi sang anŏ laih anun djru ba gơnam yua gah ia jrao, anŏ či kiăng ječ biă mă, djru mơnuih ƀôn sang plai ƀiă klin ƀă hyu, tañ rŭ glăi bruă mă dŏ dong ƀong huă hơđong tơdơi kơ ia ling dăo ngă.