Rơngiao kơ 70 thun laih, rim mơguah, yă Nguyễn Thị Hoàng Minh, dŏ pơ ƀut plơi 12, phường Buôn Ma Thuột, Dak Lăk ăt nao pơ anih pơtŏp gym giăm sang či bơtơpư̆ drơi jăn. Yă Minh lăi, hlâo adih ñu alah mơn či nao pơtŏp gym yua hrŏ prăk, laih anun ñu tha baih jing alah mơn. Samơ̆ jai hrơi ƀu hơmâo pran, juăt ruă tơlang, rơgah tơ-ut thông, ñu nao pơtŏp bơtơpư̆ drơi jăn lăp djơ̆. Mơ̆ng anun, anih pơtŏp gym jing anh ñu bơrơguăt drơi jăn, ngă mơak, djhôl pran jua, jê̆ giăm hloh hăng ană tơčô laih anun gơyut gơyâo:“Kâo nao pơ anih pơtŏp gym anai rơbêh ha thun laih. Năng blung lĕ ƀing pơtô gym pơ anai djru hăng pơtŏp brơi kâo ƀư̆, bơtơpư̆ drơi jăn rơnang. Tơdơi kơ pơtŏp giong, glăi pơ sang kâo mưn drơi jăn kâo djhôl, hơdeč ƀiă, hơmâo pran biă”.

Bơ hăng ơi Võ Ngọc Dũng, pơ phường Tuy Hòa, tơring čar Dak Lăk, bruă pah blâo mơnŭ jing tơlơi hok mơ-ak, ƀrô bruă ñu bơrơguăt drơi jăn tơdơi kơ pơdơi bruă thun tha. Rơbêh 10 thun juăt pah blâo mơnŭ, ñu hơmâo mă lu pri djŏp gưl, samơ̆ tơlơi ngă kơ ñu mơak hloh lĕ bơnai ñu thâo hluh, nao pah hrŏm ñu:“Hlâo adih kâo pah peng pong, pah boh lông hăng đă boh lông. Samơ̆ lơ̆m pah blâo mơnŭ hơmâo lu mơnuih ngui, jing rơbêh rơma pluh thun kâo hơdai pah blâo mơnŭ dong. Mơ̆ng anun truh ră anai kâo nao pah mă lu pri mơn. Amăng sang anŏ lĕ, bơnai kâo ăt ngui pah blâo mơnŭ mơn, kiăng añrăng găng yơh phun ñu”.

Tơdah gym ƀudah pah blâo mơnŭ hơmâo lan ngui prong, anih pơtŏp hăng măi mok či pơtŏp, jing bơtơpư̆ drơi jăn djom rơnang pioh kơ ƀing tha jing hơmâo lu mơnuih ruah mă, pơtŏp ñu amuñ mơn. Ƀu kiăng hơmâo măi, gơnam pơtŏp ôh, wơ̆t tơkai hơdai tơngan, ƀư̆ drơi jăn djom rơnang, suă pran lăp djơ̆, ngă brơi kơ pô pơtŏp pit mơ-ak, plai mơn ruă tơlang gang, hơtai boh pơpư̆ hơmâo pran, suă pran, eh mơañă mơak mơn.

Ră anai, ƀơi tơring čar Dak Lăk, lu grup bơtơpư̆ drơi jăn rơnang hơmâo akŏ pơdong, nao pơtŏp na nao, jing anih brơi ƀing tha pơbưp, tơpư̆ hlư̆ drơi jăn. Ƀu kơnong ngă añrăng găng, mơ̆ng grup anai, ƀing tha pơbưp, ngui ngor, thâo wai lăng tơlơi suaih pral. Anai ăt jing tơlơi tŭ yua ngă brơi tơlơi hrăm anai hơmâo lu mơnuih hor, mơ̆ng plơi prong truh pơ ƀôn lan. Yă Huỳnh Thị Ba Lan, Grup Dưỡng sinh phường Buôn Hồ, brơi thâo:“Grup bơtơpư̆ drơi jăn mơ̆ng gơmơi hơmâo 37 čô, năng blung lĕ pơtŏp kiăng kơ mơ-ak, hơmâo pran ƀiă. Tơdơi kơ anun phường akŏ pơdong grup laih anun jak iâu abih bang adơi amai mut hrŏm, jing mơ-ak hăng añrăng hloh mơn. Lơ̆m pơ phường hơmâo bruă hơget thơ jing adơi amai nao djru tom, nao pơbưp nanao laih hăng grup bơrơguăt drơi jăn mơ̆ng tơring čar Dak Lăk”.

Hăng tơlơi pơmin “Hơdip mơ-ak, hơdip añrăng, hơdip tŭ yua”, hơdôm grup ƀing tha amăng tơring čar čih pơkra bruă pơbưp, pơtŏp bơtơpư̆ drơi jăn lăp djơ̆ hăng thun tha, tơlơi hor hăng tơlơi dưi mơ̆ng rim čô mơnuih. Mơ̆ng anun, bruă bơrơguăt drơi jăn mơ̆ng ƀing tha jai hrơi đĭ tui, djru hơmâo drơi jăn, gum pơgôp plơi pla. Tui hăng yă Triệu Thị Ngoan, Khua khul ƀing tha rơma tơring čar Dak Lăk, tơdơi kơ pơmut hrŏm tơring čar, mah aka ƀu hơđong ôh, samơ̆ hơdôm grup hlâo adih, bruă mă mơ̆ng ƀing tha ăt hơmâo pơphun rese mơn:“Mah ră anai Khul ƀing tha rơma aka ƀu akŏ pơdong ôh pơ 102 boh să phường phrâo, samơ̆ ƀơi anih hơđăp, ƀing tha ăt nao pơtŏp, pơphun lu bruă tŭ yua kah hăng ngui ngor adoh suang, bơrơguăt drơi jăn, pơtŏp kiăng añrăng, pah boh lông,...kiăng pơhưč ƀing tha mut hrŏm. Mơ̆ng anun ƀing tha hơmâo pơtŏp añrăng drơi jăn, hơdip mơak, hơmâo pran jua, yâo mơ-ak”.

Ră anai, tơring čar Dak Lăk hơmâo giăm 290 rơbâo čô tha. Hrŏm hăng bruă bơrơguăt drơi jăn jai hrơi kjăp kơtang, hăng tơlơi tŭ yua ba glăi, jai hrơi hơmâo lu tha mut hrŏm, bơrơguăt drơi jăn. Anih pơbưp anun ƀu kơnong djru gơñu suaih pral, mơ-ak mơ-ai đôč ôh, ăt bang hyu pran jua hơdip hiam, hơdip mơ-ak, hơmâo pran, tŭ yua./.