Amai Nguyễn Thị Khánh Phương, dŏ ƀơi phường Tuy Hòa brơi thâo, ƀrô amăng têt hlăk thun 2023, mơnuih amăng sang anŏ gơñu hơmâo tơlơi duăm ruă kraih yua pi kian hơmâo tơlơi truh, khom jur drah lu biă mă mơ̆ng dưi pơjrao. Lăp bơni biă mă, mơnuih ruă kiăng djuai drah AB anun yơh ĕp mơnuih hơmâo drah djơ̆ hrŏm tơnap tap hin biă mă. Lơ̆m anun, sang anŏ tơnap tap, lu  anung drah arăng pơyơr dŏ djă pioh ƀơi sang ia jrao prong Phú Yên, hơmâo tŭ mă mơ̆ng ƀing čơmah brơi drah đôč đač kơ sang ia jrao, hơmâo drah djơ̆ hrŏm hăng mơnuih ruă anun yơh dưi pơhơdip brơi mơnuih sang anŏ ñu. Mơ̆ng anun, sit găng añrăng ƀiă, hmư̆ hing pơpă kiăng jur drah, amai Phương nao djru mơtam.

Bruă pơyơr drah hăng tơlơi khăp pap hlâo kơ truh hrơi ƀong têt Bính Ngọ anai lĕ tal 4 laih amăng 3 thun laih rơgao, ñu gum hrŏm brơi drah ƀơi phường Tuy An. Amai Nguyễn Thị Khánh Phương lăi:

“Yap mơ̆ng hrơi adơi kâo hơmâo tơlơi ruă kraih, kiăng drah khom jur pơmut ječ ameč hlâo adih, 3 thun rơgao sit kâo găng añrăng ƀiă kâo nao pơyơr drah yơh. Kâo čang rơmang, hơdôm tơdjôh drah ta amra dưi djru kơ mơnuih duăm kraih dưi pơhơdip mơnuih amăng mông ječ ameč kah hăng sang anŏ ta tom găn rơgao laih”.

Ăt ngă hrŏm nao pơyơr drah mơ̆n ƀơi phường Tùy An tal anai, tơdơi kơ hmư̆ tơlơi jak iâu mơ̆ng sang ia jrao prong Phú Yên, amai Đinh Thị Ngọc Ngàn, phường Tuy Hòa lăi:

“Anai lĕ tal pă laih ngă hrŏm rai brơi drah, hăng tơlơi čang rơmang kah pơpha djru ba kơ mơnuih duăm ruă hlăk kiăng amăng mông ječ ameč hloh kơƀah drah pơjrao duăm ruă. Kơnang kơ bruă ngă anai, kâo čang rơmang hơmâo lu hlăk ai, ƀing hlăk dŏ mơdrah djru hrŏm pơyơr drah pơklaih mơnuih lu hloh, djru hrŏm ngă bơngač bruă hiam thâo kah pơpha nao rai”.

Mơ̆ng akŏ blan 1 truh ră anai, Sang ia jrao prong Phú Yên hơmâo tŭ mă năng ai 330 anung drah mơ̆ng lu anih arăng pơyơr drah hăng tơlơi khăp pap ƀơi phường Tuy An, kiăng pơđĭ tui rơnoh anung drah djă pioh truh kơ 760 anung. Tui hăng ơi ia jrao Nguyễn Định Huy, Khua anom wai lăng drah -jur drah kơ mơnuih duăm ruă, Sang ia jrao prong Phú Yên, rim blan djop sang ia jrao anet kual ngŏ tơring čar Dak Lak kiăng năng ai 600 anung drah. Amăng bơyan ƀong têt, mrô mơnuih pơjrao ruă ječ ameč hăng duăm kraih lĕ lu, bruă prăp lui hlâo hơmâo drah pioh pơjrao duăm ruă tañ lĕ hơdră ngă yom biă mă kiăng prăp lui djop drah pơjrao kơ mơnuih duăm ruă amăng bơyan Têt Bính Ngọ.

“Ră anai, ƀing gơmơi hơmâo tŭ mă rơbêh 150 anung drah mơ̆ng tal jur drah arăng brơi, yua Khul jak iâu pơyơr drah tŭ mă hăng jao glăi. Laih tŭ mă, hơdôm anung drah anun, hrŏng hĭ, pơčrang tong ten kiăng ƀuh hŭi hơmâo kman laih anun kah pơpha jing 5 djuai drah tui hăng Ding jum ia jrao pơkă kah hăng: HIV, ƀing ruă hơtai B, C, ƀing djơ̆ krơ, duăm  pơgrun, kiăng hơmâo drah hiam rơgoh pioh pơjrao kơ mơnuih duăm ruă kraih amăng bơyan têt”.

Hrŏm hăng pơ kual gah ngŏ tơring čar Dak Lak, bruă ngă tui tơlơi jak iâu nao pơyơr drah têt Bính Ngọ ăt pơphun lu anih gah kual yŭ tơring čar Dak Lak. Ơi ia jrao hnơ̆ng II, Trịnh Hồng Nhựt, Khua sang ia jrao prong  kual Dap Kơdư lăi pơthâo, hăng hnơ̆ng 1.200 boh sưng đih pơjrao mơnuih duăm ruă, rim kơ bơyan têt sang ia jrao hơmâo čơkă lu mơnuih duăm ruă mut đih pơjrao. Kiăng dưi djop drah, ngă bruă pơjrao tŭ yua hloh, hmao kru djru ba mơnuih duăm ruă, khom prăp lui ia jrao gun, gơnam yua  mă bruă, pơpha  djop ơi ia jrao, nai ia jrao mă bruă, tŭ mă drah arăng ba nao pơyơr, kiăng djă pioh pơjrao kơ mơnuih duăm kraih ječ ameč:

“Kơ ia jrao gun, sang ia jrao prong hơmâo jao kơ anom sĭ ia jrao dăp hơdră, prăp lui djop ia jrao, gơnam yua pơjrao bơwih brơi pơkă lăng, pơjrao duăm ruă amăng mông têt. Hăng drah lĕ, sang ia jrao hơmâo ngă hrŏm lu khul, sang bruă djru tơlơi khăp pap, kiăng jur mă 1000 anung drah pơđôm pioh pơjrao ječ ameč, mơnuih duăm kraih. Mrô anai, amra lu hloh tơđar thun mơ̆ng 700-800 anung drah, prăp lu bruă pơjrao mơnuih duăm ruă. Kơnong hơdôm djuai drah hin, sang ia jrao hơmâo lăi pơthâo hlâo hăng ƀing djru khăp pap, pơyơr pran jua, jur drah lơ̆m pơjrao duăm ruă”.

Hăng prăp lui bruă ngă gah anom bruă ia jrao tui tơlơi kah pơpha mơ̆ng ƀing pơyơr pran jua, brơi drah, djop sang ia jrao ƀơi Dak Lak hlăk ngă djơ̆ anŏ kiăng djru pơklaih mơnuih, pơjrao amăng mông ječ ameč bơyan têt Bính Ngọ. Hơdôm anung drah dưi djă pioh hmao kru mă yua pơjrao kơ brơi ƀing duăm ruă kraih mơ̆ng anun djru hrŏm pơhlom tơlơi suaih pral kơ mơnuih ƀôn sang, kiăng djop mơnuih čơkă têt rơnuk rơnua, hlom bom.