Tơdơi kơ mông huă ƀong amăng mơmŏt mlam, yă Phạm Thị Dự ƀơi Hưng Yên, mưn ruă akŏ, hao ƀlĕ pơtah, ƀlĕ pơ-ô̆, ruă amăng pŭk mơta. Rơgao ha mlam đôč, lu tơlơi ruă ñu mưn jai kơtang tui, ruă ƀơi mơta ƀu anăm añ tah, anun sang anŏ ba nao pơ sang ia jrao pơkă lăng tơlơi ruă ƀơi sang ia jrao prong dêh čar.

Giong arăng pơkă lăng tong ten, ƀing ơi ia jrao lăi, yă Dự  hơmâo tơlơi ruă  Glocom tŭ ñu hơmâo mă đôč, tơlơi ruă čơtăng arăt amăng alăk mơta:

“Kâo pơmin lĕ ruă pơtŭk hơdrap kah hăng tơđar đôč, ñu ruă tơma amăng lăm adih, kâo ƀu pơmin ôh tơlơi ruă arăt alăk mơta. Ñu ruă kah hăng či pơtuh alăk mơta mơtam, ruă akŏ kơtang tit, hwing akŏ, ruă rui nao amăng pŭk mơta, ruă ƀu anăm añ ƀơ̆i, mơñum ia jrao ăt ƀu lưh lơi. Ƀing ơi ia jrao lăi pơjrao hăng lazer laih anun mơñum ia jrao, brơi krăp lăng amăng 2 wơ̆t hrơi tơjuh. Khă hnun, tơdơi 2 wơ̆t hrơi tơjuh pơjrao, nao ĕp glăi ƀơi sang ia jrao, mơta kâo ăt dŏ ruă đôč, ƀu lưh ôh, anun ơi ia jrao brơi brač”.

Hrŏm hăng tơlơi mưn ruă akŏ, ruă mơta kah hăng yă Dự anun, mơnuih ruă thun hlăk ai Đỗ Thị Lan Hương, dŏ pơ Hải Phòng ăt dlưh pran jua, hning rơngôt na nao yua hơmâo tơlơi ruă mơta Glocom. Hlâo kơ anun, Hương aka ƀu hơmâo djơ̆ ôh tơlơi ruă gah mơta, rơngiao kơ ñu mơmŏt mơta lăng giăm, juăt lăi cận thị, dưi lăng giăm, sui ha wơ̆t hơmâo mơ̆n tơlơi ruă ngă rơgah mơta, alăk mơta samơ̆ phiăn hơmâo gơ̆ đôč laih anun hlao mă hơjăn.

“Hnang blung a dŏ kơtuă biă mă, dlưh pran jua rơngôt đơi, pơmin tă tăn măn, tơdơi kơ nao pơkă lăng pơ ơi ia jrao pơ anai hnun kah pran jua kâo hơđong ƀiă. Blung hlâo lĕ, lơ̆m phrâo ruă ñu kraih biă, pơjrao hăng mơñum ia jrao, ƀing ơi ia jrao lăi krăp lăng ha wơ̆t hrơi tơjuh, truh sa blan, samơ̆ tơlơi ruă kâo jai kơtang tui ƀu dưi pơjrao ôh, giong anun arăt alăk mơta ƀu hơđong ôh, anun yơh brơi breh (brač) pơjrao”.

Tui hăng ƀing ơi ia jrao, Glocom lĕ tơlơi ruă phun ñu hơmâo yua čơtăng arăt amăng alăk mơta, ngă ruă arăt amăng lăm mơta, ba truh mơmŏt mơta hăng bum mơta. Tơlơi ruă Glocom ăt sa tơlơi ruă juăt hơmâo mơ̆ng ƀing bum mơta, ñu ngă mơmŏt mơta laih anun hlong bum hlao hăng ƀu thâo pơjrao glăi ôh.

Ơi ia jrao Nguyễn Thị Thanh Hương, gah anom bruă pơjrao tơlơi ruă Glocom, sang ia jrao prong pơjrao tơlơi ruă mơta dêh čar brơi thâo, kiăng kơ thâo tañ tơlơi ruă hăng pơjrao hĭ ruă mơta Glocom, khom nao pơkă lăng na nao tơlơi suaih pral:

“Mơta sa lĕ ƀing amăng sang anŏ hơmâo mơnuih ruă lĕ; juăt ƀuh hrŏm tơlơi ruă čơtăng arăt drah, tơlơi ruă gut, ruă tơ-ut tơlang…ƀing tha rơma drah nur, hơmâo tơlơi ruă mơ-añă tơbiă ia sik khom nao pơkă lăng tong ten kiăng pơgang alăk mơta, pŭk mơta, pơgăn anăm brơi ba truh tơlơi ruă mơta Glocom. Boh nik ñu, lu mơnuih ruă tha rơma laih, juăt mơñum ia jrao akha kyâo…sit mơ̆n hơmâo tơlơi ruă Glocom yua mơñum khul ia jrao djơh hăng anun đơ đa, yua lu đơi. Hrŏm hăng anun dơ̆ng, ƀing čơđai hơmâo tơlơi ruă mơmŏt mơta mơ̆ng anet, mơmŏt mơta lăng giăm đơi, truă mơnil kơtang laih, tañ biă hơmâo tơlơi ruă Glocom. Hơdôm ƀing anai lĕ kiăng khom nao pơkă lăng hăng pơjrao tañ hloh klă hloh”.

Hăng hơdôm ƀing arăng đing hơmâo tơlơi ruă Glocom, mơnuih ruă khom pơjrao na nao tơl tha yơh, ba truh mơmŏt mơta lĕ ƀu thâo pơjrao, ƀudah kiăng dưi ngă rơđah glăi mơta ôh; yua kơ anun, bruă khom ĕp lăng hăng pơjrao tañ lĕ yom biă mă. Mơnuih hơmâo tơlơi ruă khom pơjrao hăng ia jrao djơ̆ mông, mơnit, khom nao pơkă lăng djơ̆ hrơi blan pơčah, ƀu dưi lui hĭ ƀudah pơdơi hĭ du bla lơ̆m mơñum ia jrao hlăk dŏ pơjrao, kiăng mơta  dŏ djă hnơ̆ng huăi kraih laih anun anăm lui tơl bum mơta hlao.